მე ის თაობა ვარ, რომელმაც გამოიარა 9 აპრილი. მაშინ გამოვედით ახალგაზრდები და რუსულ ტანკებს ხელებს ვურტყამდით, ვეძახდით მკვლელებს და მე მინდა რუსეთი?!, – ამის შესახებ ჟურნალისტმა და პროდიუსერმა, სოფო ნიკოლაიშვილმა გადაცემაში „იმედი LIVE“ განაცხადა.
გამჭვირვალობის კანონპროექტზე საუბრისას ნიკოლაიშვილმა საქართველოს უახლეს წარსულში რუსეთის ინსპირირებით განხორციელებული ფაქტები გაიხსენა. მისივე თქმით, იგი წარმოადგენს იმ თაობას, რომლის თვალწინ გაიარა ძმათა მკვლელმა სამოქალაქო ომმა, კონფლიქტებმა, რასაც საქართველოს ტერიტორიების დაკარგვა მოჰყვა.
„ძალიან მომწონს, რომ ახალგაზრდებს ასე აღელვებთ ქვეყნის ბედი, არ არიან ისინი ინდიფერენტულები ქვეყნის მომავლის მიმართ. ერთი წუთით მაინც რომ მქონდეს ისეთი განცდა, რომ ვინმე ამ კანონით, თუნდაც ხელისუფლება მიგვაქანებს რუსეთისკენ, დამერწმუნეთ, პირველი მე ვიქნებოდი რუსთაველის გამზირზე. იცით რატომ? მე ის თაობა ვარ, რომელმაც 1989 წლის 10 აპრილს გაიღვიძა სრულ ჯოჯოხეთში! წინა დღეს 9 აპრილი მოხდა – მე მაშინ 16 წლის ვიყავი. გამოვედით ახალგაზრდები და რუსულ ტანკებს ხელებს ვურტყამდით. ვეძახდით მკვლელებს და მე მინდა რუსეთი?! ეს წარმოუდგენელია! ის თაობა ვარ, რომლის თვალწინაც გაიარა ძმათა მკვლელმა სამოქალაქო ომმა. ჩვენი მამები და ნაცნობები ერთმანეთს ხოცავდნენ – ესეც რუსეთის მიერ იყო ინსპირირებული. მე როგორ მენდომება რუსეთი?! ის თაობა ვარ, რომელმაც დაკარგა აფხაზეთი.
ჩვენ ვერ გვენდომება რუსეთი, ვერავინ დაგვაბრალებს, რომ აქედან რუსეთის მხარდამჭერი ხალხი მეტყველებს და რაღაც ინფორმაციებს გადასცემს“, – განაცხადა ნიკოლეიშვილმა.
მისივე თქმით, საზოგადოებამ მოვლენებიდან ანალიზის გაკეთება უნდა ისწავლოს.