სომხეთის პრემიერ-მინისტრმა, ნიკოლ ფაშინიანმა განაცხადა, რომ სომხეთი არ გეგმავს ომს მთიანი ყარაბაღის გამო. ინფორმაციას ამის შესახებ სომხური მედია ავრცელებს.
„სომხეთს არ აქვს ამბიციები, რომელიც საერთაშორისოდ აღიარებულ საზღვრებს სცდება. ვიმედოვნებთ, რომ დელიმიტაციის პროცესით აღდგება სომხეთის ტერიტორიული მთლიანობა“, – აღნიშნა სომხეთის მთავრობის მეთაურმა.
„მიმაჩნია, რომ ჩვენ უკვე გამოვავლინეთ ჩვენი გულწრფელობა დღეს მიღებული გადაწყვეტილებებით დელიმიტაციის პროცესში. ჩვენ ვაჩვენეთ ჩვენი გულწრფელობა შემდეგი ნაბიჯებითაც: დავადასტურეთ, რომ სომხეთის მთავრობა მზად არის, თავისი იურისდიქციის ფარგლებში მიიღოს ზომები, რათა შესაძლებელი გახდეს ხალხისთვის ცხოვრება აზერბაიჯანულ სოფლებში, კონკრეტულად 4 სოფელში, სადაც ამჟამად ხალხი არ ცხოვრობს. მაგრამ ჩვენ ასევე ვაღიარებთ, რომ იგივე პროცესის შედეგად, სომხურ სოფლებში თანაბრად შესაძლებელი უნდა გახდეს ადამიანებისთვის ცხოვრება. ამ ადამიანებს უნდა შეეძლოთ იცხოვრონ საკუთარ სახლებში, შექმნან ოჯახი და აღზარდონ ბავშვები უსაფრთხოებაზე ზრუნვის გარეშე. ეს არის ის წერტილი, რომლის ირგვლივ სომხეთისა და აზერბაიჯანის მთავრობებს უნდა შეეძლოთ მშვიდობის თეორიული დღის წესრიგის გარდაქმნა კონკრეტულ მშვიდობიან რეალობად“, – განაცხადა ნიკოლ ფაშინიანმა.