ასეთი მსჯელობა, რომ არ წავიკითხოთ და მხოლოდ ვიძახოთ, რომ ეს არის რუსული კანონი, არის სტრატეგიული გეგმა, – განაცხადა პარლამენტის თავმჯდომარის პირველმა მოადგილემ გიორგი ვოლსკიმ „ქრონიკასთან“ „უცხოური გავლენის გამჭვირვალობის შესახებ კანონპროექტთან“ დაკავშირებით.
„არაფერი საერთო არც სიტყვით, არც პათოსით, რაც ფორმულირებით რუსულ კანონთან არ აქვს. ასეთი მსჯელობა, რომ არ წავიკითხოთ და მხოლოდ ვიძახოთ, რომ ეს არის რუსული კანონი, არის სტრატეგიული გეგმა. იგივე ინსტრუქცია აქვთ იმ ახალგაზრდებს, რომლებიც ზოგი შეცდომაშია შეყვანილი, ზოგი კიდევ თავად არის ორგანიზატორი დაპირისპირების. ურჩევნიათ, საქართველოს დაუწესდეს სანქციები და ამას მოითხოვენ, ვიდრე ელემენტარულად, საზოგადოებას აცნობონ იმის თაობაზე, რა თანხას იღებენ და რა პროგრამებში ხარჯავენ“, – აღნიშნა ვოლსკიმ.
„უცხოური გავლენის გამჭვირვალობის შესახებ კანონპროექტის“ უარგუმენტო კრიტიკა კვლავ გრძელდება ოპოზიციისა და არასამთავრობო სექტორის მხრიდან. ხელისუფლების ოპონენტები კვლავ ამბობენ, რომ კანონი რუსულია, თუმცა ამის შესახებ მეტი კონკრეტიკა მათგან ამ დრომდე არავის მოუსმენია. მმართველი გუნდისთვის ოპოზიციის ეს ხერხი ერთგვარი სტრატეგიული გეგმაა, რომელსაც შეცდომაში შეყვანილი ახალგაზრდების დახმარებით ახორციელებენ.