შემიძლია, თავისუფლად ვუთხრა ნებისმიერი სკოლის მოსწავლეს და მშობლებს, რომ გააგრძელონ ჩვეულ რიტმში სწავლა-განათლება. არავითარი საფრთხე ამ კუთხით არ არსებობს., – ამის შესახებ „დღის ქრონიკის“ ეთერში განათლების, მეცნიერებისა და ახალგაზრდობის მინისტრმა, გიორგი ამილახვარმა განაცხადა.
„სკოლების უსაფრთხოება სრულად დაცულია. მე მესმის, რა თქმა უნდა, საზოგადოების, განსაკუთრებით მშობლების მღელვარება ამ საკითხთან დაკავშირებით. რამდენიმე დღის წინ და შემდეგ კიდევ ერთეული შემთხვევები დაფიქსირდა რაღაც არხებზე – [ეს იყო] სრულიად ცრუ, ყალბი ინფორმაცია, რომლის უკანაც არ დგას არაფერი, გარდა იმისა, რომ მსგავსი ტიპის მღელვარება შეექმნათ სასკოლო საზოგადოებაში და მშობლებში.
შესაბამისმა სამართალდამცავმა უწყებებმა გადაამოწმეს ყველა ის დასახელებული სკოლა, რომელიც ამ Telegram-არხის შეტყობინებაში იყო მოცემული. სრული პასუხისმგებლობით ვაცხადებ, არც ერთ სკოლაში მსგავსი არაფერი დადასტურებულა. ახლაც მიმდინარეობს მოკვლევა იმასთან დაკავშირებით, თუ ვინ ავრცელებს ამ ინფორმაციას, რა არის მისი მიზანი და ამოცანები. თუმცა, რაც შეეხება სასკოლო გარემოს, აქ სრული სიმშვიდეა და ამიტომ შემიძლია, თავისუფლად ვუთხრა ნებისმიერი სკოლის მოსწავლეს და მშობლებს, რომ გააგრძელონ ჩვეულ რიტმში სწავლა-განათლება. არავითარი საფრთხე ამ კუთხით არ არსებობს. გამოძიება გრძელდება, რათა დადგინდეს, თუ ვინ და რა მიზნით გაავრცელა მსგავსი ტიპის ყალბი ინფორმაცია“, – აღნიშნა მინისტრმა.