ბევრი გვაქვს გასაკეთებელი, რომ ევროპული ეკონომიკის პოლიტიკა შევცვალოთ, – ამის შესახებ ევროპარლამენტარმა ბოლაჟ ჰიდვეგმა „ქრონიკასთან“ ექსკლუზიურ ინტერვიუში განაცხადა.
ევროდეპუტატმა ე.წ. მწვანე შეთანხმების პოლიტიკაზე გაამახვილა ყურადღება და აღნიშნა, რომ ამ პოლიტიკის იდეოლოგია ძალიან დიდი წნეხის ქვეშ აქცევს ევროკავშირის ეკონომიკას.
„ევროკავშირის ეკონომიკა მართლაც რომ ვერ დაეწია სხვა მოწინავე სახელმწიფოებს, ვხედავთ, რომ აშშ-ს, ლათინური ამერიკის, ჩინეთის და არამხოლოდ ჩინეთის, არამედ შორეული აღმოსავლეთის ქვეყნების ეკონომიკაც კი უფრო სწრაფად იზრდება, ვიდრე ევროკავშირის, ამიტომ ბევრი გვაქვს გასაკეთებელი, რომ ევროპული ეკონომიკის პოლიტიკა შევცვალოთ. ჩვენ განსაკუთრებით ვაკრიტიკებთ ევროკავშირის ე.წ. მწვანე შეთანხმების პოლიტიკას, ამ პოლიტიკას იდეოლოგია უდევს საფუძვლად და ძალიან დიდი წნეხის ქვეშ აქცევს ევროკავშირის ეკონომიკას, განსაკუთრებით კი მცირე და საშუალო ზომის კომპანიებს. დიდი წნეხის ქვეშ ექცევა სოფლის მეურნეობის სექტორი, რადგან ისინი იძულებულები არიან დაემორჩილონ ძალიან მკაცრ მწვანე წესებს, მაშინ როდესაც იგივე წესების დაცვა ჩვენს კონკურენტებს არ მოეთხოვებათ. ამან ევროკავშირის ეკონომიკა კონკურენტუნარიანობის კუთხით უარყოფით პოზიციაში მოაქცია. მე ამჟამინდელ ვითარებას ეკონომიკურ კრიზისს ვუწოდებ. როდესაც ვხედავთ ფერმერების სოფლის მეურნეობის სექტორის მრავალათასიან აქციებს ევროპის უმსხვილეს ქალაქებში, როდესაც ისინი პროტესტით გამოდიან ბრიუსელის, ევროკომისიისა და ევროკავშირის პოლიტიკის წინააღმდეგ, ესაა ეკონომიკური და პოლიტიკური კრიზისის მკაფიო ნიშანი, ამიტომაც გვჭირდება ცვლილება“, – განაცხადა ევროპარლამენტარმა.