სენატორი ჯონი ერნსტი აშშ-ის მიერ გაწეული უცხოური დახმარების გამჭვირვალობის მოწოდებით გამოდის და USAID-ის გენერალურ ინსპექტორს მოუწოდებს, შეამოწმოს, როგორ იხარჯება ამერიკელი გადასახადის გადამხდელთა ფული უკრაინაში მცირე ბიზნესის დახმარებისთვის. ინფორმაციას ამის შესახებ ამერიკული გამოცემა Washington Examiner-ი ავრცელებს.
სენატორმა უკრაინაში მცირე ბიზნესისთვის გაწეული დახმარების შესახებ მეტი ინფორმაციის მისაღებად წერილი გაუგზავნა გენერალურ ინსპექტორს, რომელიც შეერთებული შტატების საერთაშორისო განვითარების სააგენტოს (USAID) ზედამხედველობს.
„USAID-ის ხელმძღვანელმა, სამანტა პაუერმა უარი თქვა მკაფიო ან არსებითი პასუხების გაცემაზე ჩემს მოთხოვნებზე, მეტი ინფორმაცია მოეწოდებინა USAID-ის მიერ უკრაინაში მცირე და საშუალო ბიზნესისთვის გაწეული დახმარების შესახებ. ეჭვგარეშეა: ამერიკელი ხალხი იმსახურებს გამჭვირვალობას“, – აღნიშნა სენატორმა წერილში.
„სამწუხაროდ, USAID-ს არ სურს დაუშვას გამჭვირვალობა და, შესაბამისად, ეს თქვენი სამუშაოა, როგორც მეთვალყურის, რომელსაც ევალება უზრუნველყოს, რომ სააგენტომ გადასახადის გადამხდელთა ფული გონივრულად დახარჯოს“, – ნათქვამია წერილში.
„მე მტკიცედ ვუჭერ მხარს ამერიკის ძალისხმევას უკრაინის მხარდასაჭერად ბრძოლის ველზე, მაგრამ ჩვენ უნდა მივაწოდოთ [უკრაინას] იარაღი და არა შემწეობა. უკრაინის არმიისთვის არტილერიის გაგზავნა დაეხმარება თავისუფლებასა და დემოკრატიას პუტინის ტირანიის დამარცხებაში. ახალგაზრდა უკრაინელი მხატვრების ბორდოში გაგზავნა უბრალოდ ამერიკელების შრომით ნაშოვნი საგადასახადო დოლარების უმიზნოდ დახარჯვაა“, – ნათქვამია სენატორის წერილში.
სენატორმა ხაზგასმით აღნიშნა, რომ ამერიკელი ხალხი იმსახურებს იცოდეს, სად მიდის მათი ფული და რა მასშტაბით [უცხოეთში].
