პროკურორ ანა ხახანაშვილის განცხადებით, დღევანდელ სასამართლო სხდომაზე სასამართლომ დააკმაყოფილა ბრალდების მხარის შუამდგომლობა და ბლოგერ უჩა აბაშიძეს და მის მეუღლეს აღკვეთის ღონისძიების სახით პატიმრობა შეეფარდათ.
პროკურორის თქმით, გამოძიებით დადგენილია, რომ ბრალდებულებმა საცხოვრებელ ბინაში ფარულად დაამონტაჟეს სხვადასხვა ვიდეო-აუდიო მოწყობილობები, რომელთა საშუალებითაც უკანონოდ ახორციელებდნენ ერთ-ერთ ბრალდებულსა და სხვადასხვა პირს შორის ინტიმური კავშირის ჩაწერას.
„მოგეხსენებათ, პროკურატურამ ორ პირს წარუდგინა ბრალდება პირადი ცხოვრების საიდუმლოს, კერძოდ ინტიმური კავშირის ამსახველი ვიდეომასალების უკანონო მოპოვება-შენახვის ფაქტზე. ასევე, ერთ-ერთ პირს ბრალდება წარდგენილი აქვს საბრძოლო მასალის მართლსაწინააღმდეგო შეძენისა და შენახვისთვის. დღევანდელ სასამართლო სხდომაზე სასამართლომ დააკმაყოფილა ბრალდების მხარის შუამდგომლობა. ბრალდებულებს აღკვეთის ღონისძიების სახით შეეფარდათ პატიმრობა. რაც შეეხება გავრცელებულ ვიდეომასალას, აღნიშნული, ბუნებრივია, განპირობებულია მაღალი საზოგადოებრივი ინტერესებიდან“, – განაცხადა პროკურორმა.