ოკუპირებულ აფხაზეთში ეგრეთწოდებული საპარლამენტო არჩევნები მიმდინარეობს. დეფაქტო საკანონმდებლო ორგანოში, 35 სადეპუტატო ადგილისთვის 137 კანდიდატი იბრძვის. მათგან 25 პოლიტიკურ პარტიას წარმოადგენს. საარჩევნო უბნები ოკუპირებული აფხაზეთის ტერიტორიაზე დილის 8 საათზე გაიხსნა. საკუთარი არჩევანი უკვე დააფიქსირა დეფაქტო პრეზიდენტმა.
აფხაზეთის დეფაქტო პრეზიდენტი რაულ ხაჯიმბა აფხაზეთში მიმდინარე ე.წ. არჩევნებს გამოეხმაურა.
„იმედი მაქვს, რომ ყველაფერი მშვიდად, ექსცესების გარეშე ჩაივლის. სახალხო კრებაში უნდა მოვიდნენ ის ადამიანები, ვისაც კარგად ესმის, რატომ მიდიან პარლამენტში. საკანონმდებლო ორგანოში პატრიოტები უნდა შევიდნენ. პარლამენტში ადგილები უნდა დაიკავონ ადამიანებმა, ვისაც პასუხისგებლობის გრძნობა გააჩნიათ. პარლამენტში რადიკალიზმის ადგილი არ არის“, -განაცხადა მან.
რუსული მედიის ცნობით, აფხაზეთში საპარლამენტო არჩევნებს რუსეთიდან, სამხრეთ ოსეთიდან და მთიანი ყარაბაღიდან ჩასული სპეციალისტები დააკვირდებიან.
ცოტა ხნით ადრე, დეფაქტო პრეზიდენტმა, რაულ ხაჯიმბამ რუსეთის ფედერაციის საბჭოსა და დუმის წარმომადგენლებთან განაცხადა, რომ საკანონმდებლო ორგანოს არჩევნების შემდეგ, აფხაზეთის საშინაო და საგარეო პოლიტიკა არ შეიცვლება.
ანალოგიური განცხადება გააკეთა სააგენტო Абхазия-информ-ის დირექტორმა მანანა გურგულიამ.
„სადეპუტატო მანდატებისთვის სხვადასხვა პოლიტიკური პარტიის წარმომადგენლები იბრძვიან, მათ ნაწილს მთავრობის მხარდამჭერი პოზიცია აქვთ. არიან კანდიდატები ოპოზიციიდანაც. წლევანდელ საპარლამენტო არჩევნებში სადეპუტატო მანდატისთვის იბრძვის ექსპრეზიდენტი ალექსანდრ ანქვაბი, ასევე ოპოზიციური ბლოკის ლიდერი ასლან ბჟანია. ვინც არ უნდა გაიმარჯვოს, აფხაზეთის საგარეო კურსი არ შეიცვლება. აფხაზეთი არასდროს ყოფილა და არც არის რუსოფობიურად განწყობილი. ასევე არ არსებობენ პოლიტიკოსები, რომლებიც რუსეთის წინააღმდეგ არიან განწყობილები”, – განაცხადა გურგულიამ.
ოკუპირეულ აფხაზეთში, ეგრეთწოდებულ საპარლამენტო არჩევნებთან დაკავშირებით კომენტარი გააკეთა რუსეთის დუმის წევრმა კონსტანტინ ზატულინმაც. მისი თქმით, რუსეთის ფედერაცია აფხაზეთის პარლამენტის წევრებს ფინანსურ დახმარებას გაუწევს.
აფხაზეთის საპარლამენტო არჩევნებთან დაკავშირებით ვრცელი მასალა მოამზადა BBC-ის რუსულმა ბიურომ. ბრიტანული ტელეკომპანია ექსპერტების განცხადებებსაც ავრცელებს.
კავკასიისა და ცენტრალური აზიის ქვეყნების შემსწავლელი სამუშაო ჯგუფის კოორდინატორმა ალექსანდრ სკაკოვმა თავისი შეხედულება გამოთქვა:
„პირველ რიგში მინდა აღვნიშნო, რომ აფხაზეთში ახლა ბრძოლა არ მიმდინარებს ანტირუსულად , პრორუსულად, პროდასავლურად, პროქართულად ან პროთურქულად მებრძოლ ძალებს შორის. ყველა ძალა იქ პროაფხაზურია და მათ რუსეთთან მოკავშირეობითი ურთიერთობის აუცილებლობაში ეჭვიც კი არ ეპარებათ”.
ოკუპირებულ აფხაზეთში მცხოვრები პოლიტოლოგების შეფასებით კი, წლევადელი საპარლამენტო არჩევნების მთავარი ინტრიგა, ექსპრეზიდენტის ალექსანდრ ანქვაბის მონაწილეობაა, ექსპერტები არ გამორიცხავენ, რომ ანქვაბმა დეფაქტო პარლამენტის სპიკერის პოსტი დაიკავოს.
დღეს საქართველოს პრეზიდენტი და საგარეო უწყება ოკუპურებულ აფხაზეთში ე.წ არჩევნების ჩატარებას გამოეხმაურნენ. პრეზიდენტის თქმით,
“ოკუპირებულ აფხაზეთში ე.წ. არჩევნების ჩატარება წარმოადგენს საოკუპაციო რეჟიმის ლეგიტიმაციის მორიგ მცდელობას, რომელსაც არ გააჩნია იურიდიული ძალა და ვერ ექნება სამართლებრივი შედეგი”.