კიევი არ იღებს იმ მხარდაჭერას, რომელიც მას სჭირდება რუსეთზე უპირატესობის აღსადგენად, – ნათქვამია გაზეთ Financial Times-ის სარედაქციო სტატიაში სათაურით უკრაინის ცვალებადი ომის მიზნები.
სარედაქციო სტატიაში აღნიშნულია, რომ აღმოსავლეთში, უკრაინული ჯარები კარგავენ პოზიციებს რუსული ძალების იერიშის ფონზე, თუმცა ეს მოსკოვისთვის დიდი დანაკარგების ფასად ხდება.
„ვაშინგტონსა და დასავლეთის ზოგიერთ დედაქალაქში – და უკრაინის ხელისუფლების დერეფნებში – განწყობა იცვლება: მტკიცე განწყობას იმის თაობაზე, რომ ომი დასრულდება მხოლოდ მაშინ, როდესაც რუსული არმია დატოვებს უკრაინას, ანაცვლებს იმის აღიარება, რომ საუკეთესო ვარიანტია მოლაპარაკების გზით [კონფლიქტის] გადაწყვეტა, რომელიც ქვეყნის უმეტეს ნაწილს ხელუხლებლად დატოვებს. მიუხედავად ამისა, კიევს არ ეძლევა ის მხარდაჭერა, რაც მას სჭირდება, თუნდაც ამ მიზნის მისაღწევად“, – ნათქვამია სტატიაში.
გაზეთი Financial Times-ი უკრაინის პერსპექტივები, პირველ რიგში, მოქუფრულია აშშ-ის არჩევნებში დონალდ ტრამპის შესაძლო გამარჯვების გამო, რადგან მან არაერთხელ განაცხადა, რომ ომის სწრაფად დასრულება სურს.
„თუმცა, ახლო აღმოსავლეთში ომის ესკალაციასთან ერთად, ზოგიერთ დასავლურ დედაქალაქში, სადაც ადრე დაჟინებით მოითხოვდნენ რუსეთზე სამხედრო გამარჯვებას, ახლებურად იაზრებენ თავიანთ მიზნებს. უკრაინის ზოგიერთი ოფიციალური პირი კერძო საუბრებში აცხადებს, რომ მათ არ ჰყოფნით სამხედრო პერსონალი, საცეცხლე ძალა და დასავლეთის მხარდაჭერა რუსეთის მიერ მიტაცებული მთელი ტერიტორიის დასაბრუნებლად. ამიტომ, დახურულ კარს მიღმა საუბარია შეთანხმებაზე, რომლის მიხედვითაც, მოსკოვი ინარჩუნებს დე ფაქტო კონტროლს მის მიერ ოკუპირებულ უკრაინის დაახლოებით მეხუთედზე, თუმცა რუსეთის სუვერენიტეტი ამ ტერიტორიებზე არ იქნება აღიარებული, ხოლო უკრაინას [დარჩენილი ტერიტორიით] უფლება ექნება გაწევრიანდეს ნატოში ან მიიღოს ეკვივალენტური უსაფრთხოების გარანტიები“, – აღნიშნულია სტატიაში.
თუმცა, ასეთი სცენარი ეფუძნება ამბიციურ ვარაუდებს. ერთ-ერთი ის არის, რომ აშშ და მისი მოკავშირეები მზად უნდა იყვნენ, შესთავაზონ უკრაინას ნატოში გაწევრიანება ან აუცილებელი გარანტიები.
მეორე ვარაუდი არის ის, რომ ვლადიმირ პუტინი შეიძლება დაიყოლიომ მოლაპარაკებაზე, რათა ის დათანხმდეს ასეთ სცენარს, მაგრამ უკრაინის ნატოში გაწევრიანების არდაშვება კრემლის ერთ-ერთი გამოცხადებული სამხედრო მიზანი იყო.
„დარჩენილი სამი თვის განმავლობაში აშშ-ის პრეზიდენტმა, ჯო ბაიდენმა და მისმა ევროპელმა მოკავშირეებმა მაქსიმალურად უნდა გააძლიერონ უკრაინა. დასავლეთის შესაძლებლობებისა და ინტერესების ფარგლებშია დაეხმაროს უკრაინას, დაიბრუნოს უპირატესობა მტერზე“, – ნათქვამია სტატიაში.