რუსი სამხედროები, „დანაკარგების დასამალად, მოკლული ჩრდილოეთ კორეელი ჯარისკაცების სახეებს წვავენ, ამ სიტყვების პირდაპირი მნიშვნელობით“.
ამის შესახებ უკრაინის პრეზიდენტმა, ვლადიმირ ზელენსკიმ „ტელეგრამ-არხზე“ დაწერა.
„მრავალი წლის განმავლობაში მიმდინარე ომის შემდეგაც კი, როცა გგონია, რომ რუსების მხრიდან მეტი ცინიზმი აღარ შეიძლება არსებობდეს, მაინც კიდევ უფრო უარესს ვხედავთ“, – აცხადებს უკრაინის პრეზიდენტი.
ეს არ არის პირველი შემთხვევა, როდესაც რუსეთი ბრძოლის ველზე ჩრდილოკორეელი ჯარისკაცების ყოფნის დამალვას ცდილობს. ადრე მათ წვრთნების დროს სახეების გამოჩენა ეკრძალებოდათ და რუსეთში მათი ყოფნის ნებისმიერი ვიდეომტკიცებულება ნადგურდებოდა.
„რუსეთი ჩრდილოკორეელ ჯარისკაცებს არა მხოლოდ უკრაინის პოზიციებზე თავდასხმებისთვის იყენებს, არამედ ასევე ცდილობს, მათ რიგებში არსებული დანაკარგები დამალოს… რუსები, ჩვენს ბიჭებთან ბრძოლაში დაღუპული ჩრდილოკორეელი ჯარისკაცების სახეების დაწვასაც კი ცდილობენ“, – ნათქვამია ზელენსკის განცხადებაში.
უკრაინის პრეზიდენტის თქმით, ეს ქმედებები რუსეთის ხელისუფლების მხრიდან უკიდურესი ცინიზმის გამოვლინებაა.
„ეს არის იმ ზიზღის დემონსტრირება, რომელიც ახლა რუსეთში სუფევს. ამას ჰქვია ზიზღი ყველაფრის მიმართ, რაც ადამიანურია. კორეელებს არ აქვთ მიზეზი, რომ პუტინისთვის იბრძოლონ და მოკვდნენ. მათი სიკვდილის შემდეგაც კი, რუსეთი დაღუპულ ჩრდილოკორეელ მებრძოლებს მხოლოდ დასცინის“, – წერს ზელენსკი.
მან მოუწოდა საერთაშორისო თანამეგობრობას, გაზარდოს ზეწოლა რუსეთზე, რათა ასეთი სისასტიკე შეაჩეროს.
რა არის ცნობილი უკრაინის წინააღმდეგ ომში ჩრდილოკორეელი სამხედროების მონაწილეობის შესახებ?
• 13 ოქტომბერს უკრაინის პრეზიდენტმა ვლადიმირ ზელენსკიმ განაცხადა, რომ რუსეთი და კორეის სახალხო დემოკრატიული რესპუბლიკა (DPRK) „ალიანსს აძლიერებენ“ და ამ შემთხვევაში, საქმე ეხება არა მხოლოდ უკრაინის წინააღმდეგ გამოსაყენებელი იარაღის მოსკოვისთვის მიწოდებას, არამედ რუსეთის ჯარებისთვის „მებრძოლების გადაცემასაც“. 14 ოქტომბერს ზელენსკიმ აღნიშნა, რომ უკრაინის წინააღმდეგ წარმოებულ ომს ჩრდილოეთ კორეა „ფაქტობრივად შეუერთდა“.
• 14 ოქტომბერს რუსეთის პრეზიდენტმა, ვლადიმერ პუტინმა სახელმწიფო დუმას წარუდგინა კანონპროექტი „რუსეთსა და ჩრდილოეთ კორეას შორის ყოვლისმომცველი სტრატეგიული პარტნიორობის შესახებ შეთანხმების რატიფიცირების შესახებ“. რუსეთმა და ჩრდილოეთ კორეამ ამ შეთანხმებას ხელი 2024 წლის 19 ივნისს მოაწერეს. სახელმწიფო დუმამ შეთანხმების რატიფიცირება 24 ოქტომბერს მოახდინა.
• უკრაინის თავდაცვის სამინისტროს მთავარი სადაზვერვო სამმართველოს ხელმძღვანელმა, კირილ ბუდანოვმა დაადასტურა, რომ ჩრდილოეთ კორეის დაახლოებით 11000 ჯარისკაცი, უკრაინაში საბრძოლო მოქმედებების ჩატარების მიზნით, რუსეთში საბრძოლო წვრთნებს გადის.
• მანამდე უკრაინის საზოგადოებრივ მაუწყებელს (Suspilne) დაზვერვის წყაროებმა განაცხადეს, რომ 10 ათასი ჩრდილოკორეელი ჯარისკაცი წვრთნას რუსეთის შორეულ აღმოსავლეთში გადის და უკრაინის ომში ჩაბმისთვის ემზადება. მოგვიანებით, ზელენსკიმ დასძინა, რომ ჩრდილოკორეელი ოფიცრებისა და ტექნიკური პერსონალის ყოფნა უკრაინამ დროებით ოკუპირებულ ტერიტორიებზე დააფიქსირა. ისინი ჯარების განლაგების მოსამზადებლად, სავარაუდოდ, ადრე გაგზავნეს.
• 23 ოქტომბერს აშშ-ის თავდაცვის მდივანმა, ლოიდ ოსტინმა პირველად დაადასტურა, რომ ჩრდილოკორეელი ჯარისკაცები ნამდვილად ჩავიდნენ რუსეთში.
• თავად ჩრდილოეთ კორეამ ამ ცნობებს „უსაფუძვლო ჭორები“ უწოდა. გაერო-ში DPRK-ის წარმომადგენელმა აღნიშნა, რომ ჩრდილოეთ კორეის ურთიერთობები მოსკოვთან „ლეგიტიმურია და თანამშრომლობაზეა დაფუძნებული“.
• რუსეთის ტერიტორიაზე ჩრდილოკორეელი ჯარისკაცების განლაგების შესახებ ინფორმაციაზე კომენტარი რუსეთის პრეზიდენტმა, ვლადიმერ პუტინმაც გააკეთა. მისი თქმით, „რუსეთის ფედერაციის ტერიტორიაზე კორეელი ჯარისკაცების ყოფნის დამადასტურებელი ფოტოები სერიოზული საკითხია და თუ ასეთი რამ არსებობს, ეს ნიშნავს, რომ ისინი რაღაცას ასახავს“. პუტინმა დასძინა, რომ უკრაინაში ესკალაცია გამოიწვია არა რუსეთის ქმედებებმა, არამედ „2014 წლის სახელმწიფო გადატრიალებამ, რომელსაც შეერთებულმა შტატებმა დაუჭირა მხარი“.
• 5 ნოემბერს უკრაინის თავდაცვის მინისტრმა, რუსტემ უმეროვმა დაადასტურა, რომ „პირველი შეტაკებები“ უკრაინის შეიარაღებულ ძალებსა და ჩრდილოკორეელ ჯარისკაცებს შორის კურსკის ოლქში უკვე მოხდა.