სამხედრო დამკვირვებლების ცნობით, თურქეთის მიერ მხარდაჭერილ ჯგუფებსა და სირიელ ქურთებს შორის ბოლო ორი დღის განმავლობაში ჩრდილოეთ სირიაში მიმდინარე ბრძოლების დროს, 100-ზე მეტი მებრძოლი დაიღუპა. ბრიტანეთში დაფუძნებული „სირიის ადამიანის უფლებათა ობსერვატორიის“ მონაცემებით, ქალაქ მანბიჯის მიმდებარე რამდენიმე სოფელში მომხდარ შეტაკებებს, პარასკევის საღამოდან მოყოლებული, 101 ადამიანი ემსხვერპლა, მათ შორის – პროთურქული დაჯგუფების 85 წევრი და სირიის „დემოკრატიული ძალების“ (SDF) 16 წევრი (ამ უკანასკნელში ეთნიკურად ქურთები დომინირებენ). SDF-ის განცხადებით, მათ მოიგერიეს „თურქი დაქირავებული ჯარისკაცების ყველა თავდასხმა, რომელიც თურქული დრონებისა და თვითმფრინავების მხარდაჭერით განხორციელდა“. თურქეთის თავდაცვის სამინისტრო კი იუწყება, რომ ჩრდილოეთ სირიაში 32 ქურთი მებრძოლი „განეიტრალა“, თუმცა, მათ შესახებ დამატებითი დეტალები არ გამოუქვეყნებია.
თურქეთის მხარდაჭერილმა ჯგუფებმა SDF-ის წინააღმდეგ ბრძოლა ჩრდილოეთ სირიაში იმ დროს განაახლეს, როდესაც ისლამისტმა მეამბოხეებმა 27 ნოემბერს სირიის პრეზიდენტ ბაშარ ასადს შეუტიეს, რაც 11 დღის შემდეგ ამ უკანასკნელის დამხობით დასრულდა. აშშ-ს მცდელობის მიუხედავად, რომ მანბიჯის რეგიონში დაზავება მომხდარიყო, პროთურქულმა ჯგუფებმა ალეპოს პროვინციის ჩრდილოეთში ქურთების მიერ დაკავებული მანბიჯისა და ტალ-რიფაატის რეგიონების ხელში ჩაგდება მაინც მოახერხეს. მას შემდეგ ბრძოლები დღემდე გრძელდება და დაღუპულთა რიცხვი იზრდება. პარასკევს დამასკოში ვიზიტის დროს, გერმანიის საგარეო საქმეთა მინისტრმა ანალენა ბაერბოკმა განაცხადა, რომ „მშვიდობიანი სირიისთვის“ ქურთების უსაფრთხოების უზრუნველყოფა „აუცილებელია“. მისივე თქმით, ამისათვის საჭიროა „ქვეყნის ჩრდილოეთში საომარი მოქმედებების შეწყვეტა და ქურთული ძალების სირიის უსაფრთხოების არქიტექტურაში ინტეგრირება“.
SDF აკონტროლებს უზარმაზარ ტერიტორიებს ჩრდილო-აღმოსავლეთ სირიაში და დეირ ეზ-ზორის პროვინციის ნაწილს ქვეყნის აღმოსავლეთ ნაწილში, სადაც ქურთებმა, 2011 წელს დაწყებული სამოქალაქო ომის დროს სამთავრობო ჯარების გაყვანის შემდეგ, ნახევრად ავტონომიური ადმინისტრაცია შექმნეს. აშშ-ს მხარდაჭერილმა ამ ჯგუფმა კონტროლი სხვა ტერიტორიებზეც დაამყარა და ის „ისლამური სახელმწიფოს“ ჯიჰადისტებისგან გაათავისუფლა. ანკარა SDF-ის მთავარ კომპონენტს – „სახალხო თავდაცვის ძალებს“ (YPG) – ქურთისტანის მუშათა პარტიასთან (PKK) კავშირში ადანაშაულებს, რომელიც ათწლეულების განმავლობაში თურქეთის სამხრეთ-აღმოსავლეთ ნაწილში ბრძოლას იატაკქვეშეთიდან აწარმოებს და ანკარას მიერ ტერორისტულ ორგანიზაციად არის გამოცხადებული. თურქი სამხედროები რეგულარულად ესხმიან თავს ქურთ ბოევიკებს სირიასა და მეზობელ ერაყში და მათ PKK-თან კავშირში ადანაშაულებენ.
სირიის ახალმა ლიდერმა და ისლამისტური დაჯგუფება „ჰაიათ თაჰრირ ალ-შამის“ (HTS) ხელმძღვანელმა, აჰმედ ალ-შარაამ, დეკემბრის ბოლოს „ალ არაბიას“ განუცხადა, რომ საჭიროა ადგილობრივი ქურთული ძალების ეროვნულ არმიაში ინტეგრირება. სწორედ HTS ხელმძღვანელობდა მეამბოხე ისლამისტური დაჯგუფებების კოალიციას, რომელმაც გასულ თვეში სირიაში ბაშარ ასადის ხელისუფლება დაამხო.