უკრაინის არმიაში ამჟამად 880 ათასი სამხედროა, – ამის შესახებ ქვეყნის პრეზიდენტმა, ვოლოდიმირ ზელენსკიმ პოლონეთის პრემიერ-მინისტრთან, დონალდ ტუსკთან შეხვედრის დროს განაცხადა.
„თქვენ იცით, რომ ახლა ჩვენი სახელმწიფოს ტერიტორიაზე 600 ათასი რუსი სამხედროა. რაც შეეხება უკრაინის ჯარს, დღეს 880 ათასი სამხედროა, რომლებიც იცავენ მთელ ტერიტორიას. რუსული ჯარები კონცენტრირებული არიან რამდენიმე მიმართულებით, ამიტომ ზოგიერთი მიმართულებით მათ რაოდენობრივი უპირატესობა აქვთ“, – განაცხადა ზელენსკიმ.
უკრაინის პრეზიდენტმა ასევე აღნიშნა, რომ მოკავშირეებთან მოლაპარაკებები მიმდინარეობს ომის შემდეგ ქვეყანაში სამშვიდობო ძალების განლაგების თაობაზე. ზელენსკის თქმით, ამ საკითხს დიდი ბრიტანეთის პრემიერ-მინისტრთან, კირ სტარმერთანაც განიხილავს.
ამასთან, როგორც ზელენსკიმ აღნიშნა, ამჟამად უკრაინა აწარმოებს იარაღის დაახლოებით 33-34%-ს, რაც ქვეყანას წლის განმავლობაში სჭირდება. სრულმასშტაბიან შემოჭრამდე კი ეს მაჩვენებელი 10%-ზე ნაკლები იყო.