აშშ-ის კონგრესის წარმომადგენელთა პალატის სპიკერმა მაიკ ჯონსონმა დაზვერვის საკითხებში მუდმივმოქმედი კომიტეტის თავმჯდომარის თანამდებობიდან მაიკ ტერნერი გაათავისუფლა. ინფორმაციას Politico ავრცელებს.
გამოცემის მტკიცებით, ჯონსონს სურს ახალ კონგრესში და ახალი პრეზიდენტის პირობებში კომიტეტს „ახალი სტარტი მისცეს“.
ტერნერი ფიქრობს, რომ ჯონსონის ეს გადაწყვეტილება აშშ-ის არჩეული პრეზიდენტის დონალდ ტრამპის მიერ იყო ნაკარნახევი, თუმცა თავად პალატის სპიკერი ამბობს, რომ ეს მისი პირადი გადაწყვეტილებაა.
„ეს პრეზიდენტ ტრამპის გადაწყვეტილება არ არის, ეს წარმომადგენელთა პალატის გადაწყვეტილებაა“, – თქვა მან და დასძინა, რომ ტერნერისთვის ეს გადაწყვეტილება შეურაცხმყოფელი არ იყო.
როგორც გამოცემა აღნიშნავს, ტერნერი უკრაინის დაფინანსებას ღიად უჭერდა მხარს. ჯონსონის გადაწყვეტილებით უკმაყოფილოა დაზვერვის კომიტეტის წევრი, შტატ კონექტიკუტის წარმომადგენელი ჯიმ ჰაიმსი.