კომპანია „კიევის მეტროპოლიტენის“ ყოფილი უფროსი ვიქტორ ბრაგინსკი ჯანმრთელობის შესახებ ყალბი ცნობის წყალობით უკრაინა დატოვა და საზღვარგარეთ წავიდა. ინფორმაციას უკრაინული მედია ადგილობრივ სამართალდამცველებზე დაყრდნობით ავრცელებს.
კერძოდ, სამხედრო კომისარიატთან არსებულმა ექიმების კომისიამ ბრაგინსკის ცნობა მისცა იმის შესახებ, რომ ის თითქოს და განუკურნებელი სენით არის დაავადებული. ამ ცნობამ მას უფლება მისცა სამხედრო მობილიზაციას გაჰქცეოდა და ქვეყანა დაეტოვებინა.
„ფაქტთან დაკავშირებით დაწყებულია სისხლის სამართლის საქმის მოკვლევა, რის ფარგლებშიც დედაქალაქის პოლიციის გამომძიებლები ამჟამად საწარმოს შენობაში ჩხრეკას ატარებენ“, – წერს მედია.
ბრაგინსკი „კიევის მეტროპოლიტენს“ 2014 – 2024 წლებში ხელმძღვანელობდა. გასული წლის მარტში მან გადადგომის შესახებ განცხადება დაწერა.