27 იანვარს, ევროკავშირმა სანქციები დაუწესა რუსეთის სამხედრო დაზვერვის (ГРУ) სამ თანამშრომელს, რომლებმაც 2020 წლის მაისში ესტონეთზე კიბერშეტევა განახორციელეს.
გასული წლის შემოდგომაზე, გამოძიების დასრულების შემდეგ, ესტონეთმა კიბერშეტევაში მონაწილე ГРУ-ს სამი თანამშრომლის ვინაობა დაასახელა. ესენი არიან: იური დენისოვი, ნიკოლაი კორჩაგინი და ვიტალი შევჩენკო. მოგვიანებით, მათზე საერთაშორისო ძებნა გამოცხადდა.
ესტონეთის საგარეო საქმეთა სამინისტროს განცხადებით, ეს პირები რუსეთის სამხედრო დაზვერვის 29155-ე განყოფილების წევრები არიან. ეს ქვედანაყოფი სამთავრობო უწყებების, ევროკავშირისა და ნატო-ს კრიტიკული ინფრასტრუქტურის დასუსტებაზე მუშაობს და უკრაინის მხარდაჭერისთვის ხელის შეშლას ცდილობს.
ეს არის პირველი შემთხვევა, როდესაც ესტონეთმა მის წინააღმდეგ განხორციელებული კიბერშეტევების კონკრეტული მონაწილეები დაასახელა.
ამ სამი პირის მიმართ შემაკავებელი ზომები, ევროკავშირის კიბერსანქციების რეჟიმის ფარგლებში, უკვე შემოღებულია.
„რუსეთი, ჰიბრიდული ქმედებებით, ცდილობს შეარყიოს დასავლეთის ერთიანობა, დათესოს შიში და ქაოსი საზოგადოებაში“, – განაცხადა ესტონეთის საგარეო საქმეთა მინისტრმა, მარგუს ცაჰკნამ ორშაბათს ბრიუსელში გამართულ ევროკავშირის ქვეყნების საგარეო საქმეთა მინისტრების შეხვედრაზე.
„აგრესორის ერთ-ერთი ინსტრუმენტია კიბერშეტევები თანამედროვე ქვეყნების, მათ შორის, ესტონეთის წინააღმდეგ, სადაც სერვისების უმეტესობის მიწოდება ციფრულ ფორმატში ხდება. ბრმები არ ვართ და ამ სქემას კარგად ვხედავთ“, – აღნიშნა მან.
ცაჰკნას თქმით, ესტონეთი, საერთაშორისო პარტნიორებთან თანამშრომლობის ფარგლებში, გააგრძელებს მუშაობას უსაფრთხოების დაცვისა და ევროპული ღირებულებების შესანარჩუნებლად. „ესტონეთი ასევე მომხრეა, რომ ყველა ქვეყანამ პატივი სცეს საერთაშორისო სამართალს კიბერსივრცეში“, – დასძინა მინისტრმა.
2019 წლის მაისში, ევროკავშირმა შეიმუშავა სანქციების სისტემა, რომელიც მას საშუალებას აძლევს, გამოიყენოს მიზანმიმართული შემაკავებელი ზომები კიბერშეტევების თავიდან ასაცილებლად და მასზე რეაგირებისთვის, თუ ჰაკერული თავდასხმები საფრთხეს უქმნის ევროკავშირს ან მის წევრ ქვეყნებს.
სანქციების რეჟიმი ვრცელდება ისეთ კიბერშეტევებზე, რომლებსაც მნიშვნელოვანი გავლენის მოხდენა შეუძლიათ და ევროკავშირის ფარგლებს გარედან, ფიზიკური ან იურიდიული პირების მიერ, ან მათი მხარდაჭერით ხორციელდება.
შემაკავებელი ზომები მოიცავს ევროკავშირში მოგზაურობის აკრძალვას და ფიზიკური და იურიდიული პირების აქტივების გაყინვას.