უნგრეთის მთავრობა ლგბტქ+ პრაიდის მსვლელობას კრძალავს. ამის შესახებ ინფორმაციას „პოლიტიკო“ უნგრეთის მთავრობაზე დაყრდნობით ავრცელებს.
უნგრეთს მთავრობის წარმომადგენელი, გერგლი გულიაში აცხადებს, რომ საზოგადოებრივ სივრცეში მსვლელობა აღარ გაიმართება, როგორც ეს ათწლეულების განმავლობაში ხდებოდა.
გულიაშმა პრესკონფერენციაზე აღნიშნა, რომ ლგბტქ+ მარშის აკრძალვა შეესაბამება შემოთავაზებულ საკონსტიტუციო ცვლილებას, რომელშიც ნათქვამია, რომ „ბავშვების ფიზიკური, გონებრივი და მორალური განვითარების უფლება შეუქცევადია“.
კითხვაზე პასუხად, თუ რატომ აცხადებს, რომ პრაიდის მსვლელობები ბავშვებისთვის საზიანოა, გულიაშმა განაცხადა: „ეს საღი აზრია“.
უნგრეთის პრემიერ-მინისტრმა, ვიქტორ ორბანმა გასულ შაბათ-კვირას განაცხადა, რომ ის ურჩევს ლგბტქ+ მარშის ორგანიზატორებს, „არ შეწუხდნენ წლევანდელი მარშის მომზადებისთვის“, რადგან „ეს იქნება დროისა და ფულის ფუჭად დაკარგვა“.