თავდაცვის სამიტზე დასასწრებად, ლონდონში, სხვადასხვა ქვეყნის ლიდერები იკრიბებიან. შეხვედრაზე, სადაც უკრაინის საკითხი უნდა განიხილონ, მონაწილეობას მიიღებენ ევროპელი ლიდერები, უკრაინის პრეზიდენტი, ასევე კანადის პრემიერ-მინისტრი, ევროკომისიისა და ევროპული საბჭოს პრეზიდენტები. ადგილზე უკვე მივიდა იტალიის პრემიერი.
სამიტის დაწყებამდე, დიდი ბრიტანეთის პრემიერ-მინისტრი ინდივიდუალურ შეხვედრებს მართავს.
ევროკომისიის პრეზიდენტი ურსულა ფონ დერ ლაიენი ამბობს, რომ ევროპა უკრაინის მხარდაჭერას გააგრძელებს და ევროპის თავდაცვის შესაძლებლობებს გაზრდის.
“ლონდონისკენ მიმავალ გზაზე ვარ, რათა ხაზი გავუსვა ევროპის მუდმივ მხარდაჭერას უკრაინის მიმართ, რამაც შეიძლება სამართლიანი და ხანგრძლივი მშვიდობა მოიტანოს უკრაინაში.
გზა მშვიდობისკენ სიძლიერეშია. სისუსტე მეტ ომს ბადებს.
ჩვენ გავაგრძელებთ უკრაინის მხარდაჭერას, ამასთანავე, გავზრდით ევროპის თავდაცვის შესაძლებლობებს”, – აცხადებს ევროკომისიის პრეზიდენტი ურსულა ფონ დერ ლაიენი