ეროვნული უსაფრთხოების საკითხებში აშშ-ის პრეზიდენტის მრჩეველმა, მაიკ უოლცმა განაცხადა, რომ აშშ-ს სჭირდება უკრაინის ლიდერი, რომელიც მზად არის უზრუნველყოს რუსეთთან ხანგრძლივი მშვიდობა, მაგრამ არ არის ნათელი, რომ უკრაინის პრეზიდენტი, ვოლოდიმირ ზელენსკი მზად არის ამისათვის.
ტელეკომპანია CNN-თან ინტერვიუში მაიკ უოლცმა ხაზგასმით აღნიშნა, რომ ვაშინგტონს სურს უზრუნველყოს მუდმივი მშვიდობა მოსკოვსა და კიევს შორის, რომელიც მოიცავს კიევის მხრიდან ტერიტორიულ დათმობებს უსაფრთხოების გარანტიების სანაცვლოდ, რომელსაც ევროპა უზრუნველყოფს.
კითხვაზე, სურს თუ არა ტრამპს ზელენსკის გადადგომა, უოლცმა უპასუხა:
„ჩვენ გვჭირდება ლიდერი, რომელიც შეძლებს ჩვენთან ურთიერთობას, საბოლოოდ რუსებთან მოლაპარაკებას და ამ ომის დასრულებას“.
„თუ ცხადი გახდება, რომ პრეზიდენტ ზელენსკის პირადი მოტივები ან პოლიტიკური მოტივები ეწინააღმდეგება მის ქვეყანაში საბრძოლო მოქმედებების შეწყვეტის მიზანს, მაშინ ვფიქრობ, ჩვენ რეალური პრობლემა გვექნება“, – დასძინა ეროვნული უსაფრთხოების საკითხებში აშშ-ის პრეზიდენტის მრჩეველმა.