კიევი და მოსკოვი სუჯის (კურსკის ოლქი) გაზგამანაწილებელ სადგურზე თავდასხმაში ერთმანეთს ადანაშაულებენ. მოსკოვმა განაცხადა, რომ უკრაინამ ობიექტი ტერორისტული აქტის შედეგად ააფეთქა, თუმცა კიევმა ამ ფაქტთან რაიმე კავშირი უარყო და რუსეთს, „პროვოკაციის მიზნით“, გაზგამანაწილებელი სადგურის დაბომბვაში დასდო ბრალი.
სუჯის რაიონის სოფელ კაზაჩია ლოკნიას მცხოვრები, 44 წლის იური ტარასენკო დგას საკუთარი სახლის ეზოში, თავისი გარდაცვლილი ახლობლის საფლავთან, რომელიც ოკუპაციის დროს სამედიცინო დახმარების ხელმიუწვდომლობის გამო დაიღუპა. სოფელი ადრე უკრაინული ჯარების მიერ იყო ოკუპირებული და რუსეთის შეიარაღებულმა ძალებმა კიევი და მოსკოვი, ამერიკის შეერთებული შტატების შუამავლობით, ენერგეტიკულ ინფრასტრუქტურაზე თავდასხმების შეწყვეტაზე შეთანხმდნენ, თუმცა, ამ ობიექტებზე რუსული და უკრაინული ძალების იერიშები და დაბომბვები ბოლო დღეებში მაინც გაგრძელდა.
სუჯის (კურსკის ოლქი) გაზგამანაწილებელ სადგურზე თავდასხმაში ორივე მხარე ერთმანეთს ადანაშაულებს. ადრე სწორედ აქედან ხდებოდა ევროპაში რუსული გაზის ტრანსპორტირება (უკრაინის გავლით).
რუსული სახელმწიფო ტელევიზია „როსია 24“ და რამდენიმე რუსული „ტელეგრამ-არხი“, მათ შორის „Baza“, რომელიც სამართალდამცავ ორგანოებთან სიახლოვით არის ცნობილი, ცეცხლმოკიდებული სადგურის კადრებს აქვეყნებენ და მომხდარში უკრაინელ სამხედროებს ადანაშაულებენ.
„კურსკის ოლქიდან უკან დახეული უკრაინის არმიის ქვედანაყოფების მიერ რუსეთის მნიშვნელოვანი ენერგეტიკული ობიექტის აფეთქება კიევის რეჟიმის წინასწარ განზრახული პროვოკაციაა“, – ნათქვამია რუსეთის თავდაცვის სამინისტროს განცხადებაში.
„[ეს] უნდა განვიხილოთ, როგორც რუსეთის ფედერაციის ენერგეტიკული ინფრასტრუქტურის წინააღმდეგ ბოლო დროს განხორციელებული თავდასხმების სერიის ნაწილი, რომლის მიზანი აშშ-ს პრეზიდენტის სამშვიდობო ინიციატივების დისკრედიტაციაა“, – აცხადებს რუსეთის თავდაცვის უწყება.
უკრაინამ მომხდარში თავისი ყოველგვარი მონაწილეობა უარყო და რუსული „დისკრედიტაციის კამპანია“ დაუყოვნებლივ დაგმო.
„ეს ბრალდებები უსაფუძვლოა. სინამდვილეში, რუსებმა თავად არაერთხელ დაბომბეს სადგური“, – აღნიშნა უკრაინის გენერალურმა შტაბმა ფეისბუკზე და დასძინა, რომ რუსულმა ძალებმა „ღამით საარტილერიო ჭურვები ესროლეს ობიექტს“.
ამასობაში, კრემლმა დაადასტურა, რომ პრეზიდენტ ვლადიმირ პუტინის ბრძანება უკრაინის ენერგეტიკულ ინფრასტრუქტურაზე თავდასხმების დროებით შეჩერების შესახებ კვლავ ძალაშია.
„მასირებული“ საჰაერო თავდასხმის შემდეგ,ზელენსკი რუსეთზე „ზეწოლას“ ითხოვს
ამავდროულად, ბრძოლები კიევსა და მოსკოვს შორის გრძელდება. გასულ ღამეს, უკრაინის ქალაქ ოდესაზე რუსული დრონებით ერთ-ერთი ყველაზე მასშტაბური თავდასხმა განხორციელდა.
უკრაინული მხარის განცხადებით, თავდასხმაში 200-ზე მეტი დრონი მონაწილეობდა. მათი იერიშების შედეგად, სამი ადამიანი დაშავდა და რამდენიმე ხანძარი გაჩნდა მაშინ, როდესაც ქალაქს ჩეხეთის პრეზიდენტი სტუმრობდა.
უკრაინის პრეზიდენტმა, ვლადიმირ ზელენსკიმ მოკავშირეებს, მათ შორის შეერთებულ შტატებს, მოუწოდა, რომ ამ „მასირებული“ თავდასხმის შემდეგ, მოსკოვზე „ზეწოლა” მოახდინონ.
„რუსეთზე ერთობლივი ზეწოლა, უფრო მკაცრ სანქციებთან და უკრაინის თავდაცვის მეტ მხარდაჭერასთან ერთად, შესაძლებელს გახდის ამგვარი ტერორის დასრულებას და რუსეთის მიერ გაჭიანურებული ომის შეწყვეტას“, – განაცხადა ზელენსკიმ სოციალურ ქსელებში.
პარალელურად, ბრძოლები გრძელდება უკრაინის საზღვართან ახლოს, კურსკის ოლქში, სადაც რუსულმა ძალებმა, თავიანთი ტერიტორიიდან უკრაინული ჯარების განდევნის მიზნით, ბოლო კვირების განმავლობაში უპრეცედენტო სისწრაფით წაიწიეს წინ.
ამასობაში, შეერთებული შტატები უკრაინასა და რუსეთს შორის სამშვიდობო შეთანხმების მიღწევას ცდილობს. კიევმა მიიღო ვაშინგტონის წინადადება 30 დღით ცეცხლის შეწყვეტის შესახებ, მაგრამ რუსეთმა ეს წინადადება უარყო. ამერიკის პრეზიდენტთან სატელეფონო საუბრისას, ვლადიმირ პუტინი მხოლოდ უკრაინის ენერგეტიკულ ინფრასტრუქტურაზე თავდასხმების დროებით შეჩერებას დათანხმდა.
უკრაინის, ამერიკის შეერთებული შტატებისა და რუსეთის დელეგაციები ორშაბათს, 24 მარტს, ცალ-ცალკე შეიკრიბებიან საუდის არაბეთში, რათა ცეცხლის შეწყვეტის შესახებ უფრო ფართომასშტაბიანი შეთანხმების დეტალები განიხილონ. ზელენსკის თქმით, უკრაინაში მშვიდობის დამყარების შესახებ მოლაპარაკებების ამ ახალი რაუნდის მიმართ ის ოპტიმისტურად არის განწყობილი.
