წინასწარი მონაცემებით, ელექტროგადამცემ ხაზის, „კავკასიონის“ დაზიანების მიზეზი ხანძრის კერა გახდა. ამის შესახებ „საქართველოს სახელმწიფო ელექტროსისტემის“ განცხადებაშია აღნიშნული.
როგორც განცხადებაშია ნათქვამი, შედეგად საქართველოს თითქმის ყველა რეგიონში მომხმარებლის დაახლოებით 90%-ს შეუწყდა ელექტროენერგია.
როგორც „საქართველოს სახელმწიფო ელექტროსისტემაში“ აცხადებენ, მყისიერი რეაგირების შედეგად, უმოკლეს ვადაში მოხერხდა ელექტროენერგიის სრულად აღდგენა.
„19 აპრილს 11:08 საათზე ავარიულად გამოირთო 500 კვ. ელექტროგადამცემი ხაზი „კავკასიონი“. წინასწარი მონაცემებით, ელექტროგადამცემი ხაზის დაზიანების მიზეზი გახდა ხანძრის კერა.
ელექტროგადამცემი ხაზის გათიშვის შედეგად ელექტროსისტემაში მოხდა ელექტრული პარამეტრების დარღვევა, გამოირთო „ენგურჰესი“ და სხვა დიდი და მცირე ელექტროსადგურები.
გენერაციის ობიექტების გამორთვის შედეგად 11:15 საათზე საქართველოს თითქმის ყველა რეგიონში მომხმარებლის დაახლოებით 90%-ს შეუწყდა ელექტროენერგიის მიწოდება.
„საქართველოს სახელმწიფო ელექტროსისტემის“ მხრიდან მოხდა მყისიერი რეაგირება, უმოკლეს დროში, 35 წუთში მოხერხდა ელექტროენერგეტიკული სისტემის გამანაწილებელ კომპანიებზე ელექტროენერგიის სრულად მიწოდება“, – აღნიშნულია განცადებაში.