ლოგიკას მოკლებულია ის შეფასებები, რომ საქართველომ თითქოსდა, გაამარტივა სავიზო მიმოსვლა გარკვეულ ქვეყნებთან, – განაცხადა მარიამ ქვრივიშვილმა.
ეკონომიკისა და მდგრადი განვითარების მინისტრის მოადგილის თქმით, გარკვეული მხარეები, მათ შორის, პოლიტიკური პარტიები, მედია საშუალებები სავიზო რეგულაციებთან დაკავშირებით ხშირად ცდილობენ ინფორმაციის ინტერპრეტირებას, საზოგადოების შეცდომაში შეყვანას.
„მთავრობის დადგენილებაში, რომელშიც ნათლად არის ასახული და ყველა დაინტერესებულ მხარეს შეუძლია, წაიკითხოს, გარკვევით სწერია, რომ პირიქით, იზღუდება და მკაცრდება სავიზო რეგულაციები გარკვეული ქვეყნებისთვის. აღნიშნულია, რომ არის მომატებული რისკი არალეგალური მიგრაციის და სწორედ აღნიშნულმა დადგენილებამ შეზღუდა, გარკვეული ქვეყნებიდან მოქალაქეების უვიზოდ შემოსვლა, თუკი მათ მინიმუმ ერთ წელზე მეტი არ აქვთ ბინადრობის უფლება ყურის ქვეყნების.
საკმაოდ დიდი ხანია, ვხედავთ იმას, რომ გარკვეული მხარეები, პოლიტიკური პარტიები, მათ შორის, სამწუხაროდ, მედია საშუალებები ხშირად ცდილობენ ინფორმაციის ინტერპრეტირებას, საზოგადოების შეცდომაში შეყვანას. ეს არის ნათელი მაგალითი იმისა, თუ როგორ ხდება, არასწორი ინფორმაციების გავრცელება, მათ შორის საზღვრებს გარეთ გატანა. რა თქმა უნდა, ლოგიკას მოკლებულია ის შეფასებები, რომ საქართველომ თითქოსდა, გაამარტივა სავიზო მიმოსვლა იმ ქვეყნებთან, რომლებთანაც პირიქით, გაამკაცრა“, – განაცხადა ქვრივიშვილმა.
სხვადასხვა მედიასაშუალებისა და სოციალური ქსელის მეშვეობით დაწყებულ დეზინფორმაციულ კამპანიას, თითქოს, 17 აპრილის დადგენილებით 17 ქვეყნის მოქალაქე ქვეყანაში უვიზოდ შემოსვლას შეძლებს, ამერიკელი კონგრესმენი, ჯო უილსონი ეხმიანება.
აღნიშნულ საკითზე საქართველოს შინაგან საქმეთა სამინისტრომ განმარტა, რომ სხვადასხვა მედიასაშუალებასა და სოციალურ ქსელში არასწორი ინტერპრეტაციით, მიზანმიმართულად ვრცელდება ინფორმაცია, თითქოს 2025 წლის 17 აპრილს მიღებული ცვლილებები ამარტივებს საქართველოს საზღვარზე შემოსვლას რიგი ქვეყნების მოქალაქეებისთვის, სიმართლეს არ შეესაბამება. უწყება აცხადებს, რომ ცვლილებები ემსახურება გარკვეული ქვეყნების მოქალაქეებისთვის საქართველოში უვიზოდ შემოსვლის უფლების გამკაცრებას და ემსახურება უკანონო მიგრაციის წინააღმდეგ ბრძოლას.