ჩვენ ვცხოვრობთ გეოპოლიტიკურად ტრანზიციულ ეპოქაში. თუ აქამდე გარკვეულწილად საერთაშორისო სისტემა იყო სტაბილური, ქვეყნები შეთანხმებული იყვნენ გარკვეულ სამართლებრივ წესრიგზე, გარკვეულ ნდობაზე იყო დაფუძნებული საერთაშორისო სტრუქტურა, ახლა ვართ ამ სტრუქტურის მორღვევის ეპოქაში, – განაცხადა მსოფლიოში მიმდინარე მოვლენებზე საუბრისას საერთაშორისო ურთიერთობების სპეციალისტმა შოთა თხელიძემ გადაცემაში „იმედის კვირა“.
მან ასევე აღნიშნა, რომ შექმნილ ვითარებაში საქართველომ ნებისმიერ კონფლიქტში ჩართულობა თავიდან უნდა აირიდოს.
„ჩვენ ერთ-ერთ ყველაზე მოწყვლად რეგიონში ვიმყოფებით, სადაც გადის ე.წ. გეოპოლიტიკური გაყოფის ხაზი. ამიტომ თავიდან არიდება ნებისმიერ კონფლიქტში ამა თუ იმ სახით ჩართულობისა, დიპლომატიური ჩართულობა თუ პოლიტიკური, სამხედროს [ჩართულობას] აღარ ვახსენებ, არის მნიშვნელოვანი, რომ სახელმწიფომ შეინარჩუნოს საკუთარი ეგზისტენციალობა და თუ დამატებით სარგებელს ნახავს, ეს ყველასთვის მისაღები იქნება“, – განაცხადა შოთა თხელიძემ.
მან იმ შესაძლებლობებზეც ისაუბრა, რომლებსაც საქართველოს გეოგრაფიული მდებარეობა აძლევს.
„საქართველოზე უკვე არსებობს ტრანზიტული მარშრუტები, რკინიგზა, გაზსადენები და რაც მთავარია, ჩვენ გვაქვს ზღვის უპირატესობა, ამ შემთხვევაში პორტების უპირატესობა – იქნება ეს ფოთის პორტი და სამომავლოდ ანაკლიის პორტ. ჩვენთვის მნიშვნელოვანია არა მარტო აღმოსავლეთ-დასავლეთ დერეფნის აქტივაციის რესურსი, ასევე ჩრდილოეთ-სამხრეთის რესურსიც, რომელიც შეიძლება, აღმოჩნდეს გარკვეულწილად ჩვენთვის ტერიტორიული მთლიანობის აღდგენის გზაზე მომგებიანი პროცესი გეოპოლიტიკური თვალსაზრისი”, – აღნიშნა შოთა თხელიძემ.