საჯარო რეესტრის დოკუმენტით, “კურიერის” მიერ მოპოვებული ინფორმაცია დღეს ოფიციალურად დადასტურდა. მამუკა ხაზარაძის ოჯახი გერმანიის ელჩზე სახლს თითქმის სამი წელი ისე აქირავებდა, რომ იჯარის ხელშეკრულება არც იუსტიციის სამინისტროში ჰქონდა დარეგისტრირებული და არც შემოსავლების სამსახურში კანონით დადგენილ საშემოსავლო გადასახადს იხდიდა. უძრავი ქონებაზე საიჯარო ხელშეკრულების ოფიციალური რეგისტრაცია მამუკა ხაზარაძის მეუღლემ მხოლოდ გუშინ, დაჩქარებული წესით მოითხოვა, თუმცა სახლი 2022 წლის ოქტომბრიდან გერმანიის ელჩის სარგებლობაშია.
ის, რასაც ალეკო ელისაშვილი ბოდვას უწოდებს, საქართველოს კანონმდებლობით საგადასახადო ვალდებულებისგან თავის არიდებაა. საპატიმროდან გავრცელებულ განცხადებაში თავად მამუკა ხაზარაძემაც აღიარა, რომ სახლის გაქირავებიდან მიღებულ სარგებელზე საშემოსავლო გადასახადს არ იხდიდა. “ლელოს” ლიდერმა ფაქტს გადახდის წყაროსთან წარმოქმნილი გაუგებრობა უწოდა, თუმცა გამორჩა, რომ დიპლომატიური მისიის ხელმძღვანელს ქირის თანხაზე საშემოსავლოს გადახდის ვალდებულება არ გააჩნია. კანონმდებლობით, ეს მხოლოდ უძრავი ქონების მესაკუთრის პასუხისმგებლობაა, რომელმაც ქონების გაქირავებით კონკრეტული შემოსავალი მიიღო. მამუკა ხაზარაძის პარტიაში დღეს ტექნიკური შეცდომა უწოდეს ფაქტს, რომ თითქმის სამი წლის განმავლობაში ყოფილი ბანკირი 5%-იან გადასახადს არ იხდიდა.
გაუგებრობა, ტექნიკური შეცდომა, გადასახადების დამალვა თუ პოლიტიკური კორუფცია – საკითხს ახლა შემოსავლების სამსახური სწავლობს. უწყება სიცრუეს უწოდებს მამუკა ხაზარაძის მიერ საპატიმროდან გავრცელებულ ინფორმაციას, თითქოს ტექნიკური გაუგებრობა თავად აღმოაჩინეს და საგადასახადო სამსახურსაც საკუთარი ინიციატივით მიმართეს.
მმართველ გუნდში მამუკა ხაზარაძისგან ფინანსური დარღვევები არ უკვირთ. პარლამენტის თავმჯდომარე ამბობს, რომ გერმანიის ელჩმა “ლელოს” ლიდერთან სახელშეკრულებო ურთიერთობით საკუთარი ქვეყანა საგადასახადო სკანდალში გახვია. დიპლომატს ვენის კონვენციის დაცვისკენ მოუწოდებს საქართველოს საგარეო უწყების ხელმძღვანელიც.
საკითხს დღეს პრემიერ-მინისტრი კიდევ ერთხელ გამოეხმაურა. რეალური თუ ფიქტიური გარიგება – ირაკლი კობახიძე მიიჩნევს, რომ მთავარ კითხვაზე პასუხი ჯერ არ გაცემულა. მმართველი გუნდი არ გამორიცხავს, რომ საქმე პოლიტიკურ კორუფციას უკავშირდებოდეს.
საჯარო რეესტრის და შემოსავლების სამსახურის გარდა, მამუკა ხაზარაძემ საიჯარო ურთიერთობიდან მიღებული შემოსავალი არც დეკლარაციაში ასახა. დოკუმენტში ყავლაშვილის 14 ნომერში სახლის გაქირავებიდან მიღებული შემოსავალი არ იძებნება. მისამართზე, სადაც გერმანიის ელჩი ცხოვრობს, დეკლარაციის მიხედვით მხოლოდ შპს “ხაზარაძე ჰოლდინგი” ფუნქციონირებს. “კურიერის” ინფორმაციით, დეკლარაციაში შემოსავლების სავარაუდო დამალვის ფაქტზე მოკვლევა ანტიკორუფციულმა სააგენტომაც დაიწყო.