პროკურორმა ლაშა კოტრიკაძემ პროკურატურაში საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტზე მიმდინარე გამოძიებასთან დაკავშირებით გადაცემაში „დღის ქრონიკა“ ისაუბრა.
კითხვაზე, რატომ მოდის არასამთავრობო ორგანიზაციების საქმიანობასთან კონფლიქტში ის ფაქტი, რომ ისინი აქციებზე დაჯარიმებულებს ჯარიმებს უხდიდნენ, პროკურორმა აღნიშნა, რომ წინასწარ შეპირებული ფინანსური დახმარება, დანაშაულში თანამონაწილეობაა.
„აქ იმას უნდა მივაქციოთ ყურადღება, რომ ეს ხდებოდა მასობრივად და წინასწარ გამოცხადებულად. პირდაპირ სიგნალი იყო, რომ სამართალდარღვევის ჩადენის შემთხვევაში, მზად ვართ, რომ ჯარიმები გადაგიხადოთო. ყველაფერს რომ თავი დავანებოთ, წინასწარ შეპირებული ფინანსური დახმარება, დანაშაულში თანამონაწილეობაა. როდესაც აქციის მონაწილეებმა იცოდნენ, რომ სამართალდარღვევის ჩადენის შემთხვევაში, მათ ჯარიმას გადაიხდიდნენ, მოქალაქეს არაფერი აღარ აკავებს ამ შემთხვევაში და ეს არის პირდაპირი წახალისება დანაშაულებრივი ქმედებებისა და სამართალდარღვევების. საქმის მასალებზე დაყრდნობით, ამ ეტაპზე შეგვიძლია ვთქვათ, რომ ორგანიზაციებმა დონორი ორგანიზაციების თანხები გამოიყენეს აქციების ორგანიზებისა და წახალისებისთვის“, – აღნიშნა პროკურორმა.