მოსწავლე-ახალგაზრდობის სასახლემ არაერთი თაობა აღუზარდა ჩვენს ქვეყანას, ეს სასახლე ინახავს ჩვენს დემოკრატიულ ისტორიას – სწორედ აქ დაიდო ბინა პირველი რესპუბლიკის მთავრობამ, აქ გამოცხადდა საქართველოს დამოუკიდებლობის აღდგენა და ჩაეყარა საფუძველი ქართულ პარლამენტარიზმს, – ამის შესახებ საქართველოს პრემიერ-მინისტრმა ირაკლი კობახიძემ მოსწავლე-ახალგაზრდობის განახლებული სასახლის გახსნის ღონისძიებაზე სიტყვით გამოსვლისას განაცხადა.
პრემიერის თქმით, სასახლის შენობა არა მხოლოდ არქიტექტურული ძეგლი და ქვეყნის კულტურული მემკვიდრეობა, არამედ საქართველოს ისტორიის განუყოფელი ნაწილია.
„ეს არის სასახლე, რომელიც ინახავს ჩვენი ქვეყნის ისტორიას. ამ სასახლემ არაერთი თაობა აღუზარდა ჩვენს ქვეყანას, როგორც შემოქმედები, ასევე მეცნიერების, სპორტის წარმომადგენლები და ჩვენი პასუხისმგებლობა იყო, განსაკუთრებული ზრუნვა გამოგვეჩინა ამ სასახლის მიმართ. ყველაზე ძვირფასი და მნიშვნელოვანი არის ინვესტიცია, რომელიც იდება მომავალი თაობების და ახალგაზრდების სასარგებლოდ. დარწმუნებული ვარ, ეროვნული სასახლე კიდევ მრავალ თაობას აღუზრდის ჩვენს ქვეყანას, კიდევ მრავალი თაობა დაეუფლება აქ ხელოვნების, მეცნიერების საფუძვლებს, ეზიარება სპორტს და კიდევ ბევრი ღირსეული ადამიანი შეემატება ჩვენს კულტურის, მეცნიერების, სპორტის სფეროს,“ – განაცხადა პრემიერ-მინისტრმა.
ირაკლი კობახიძემ მადლობა გადაუხადა დედაქალაქის მერ კახა კალაძეს და აღნიშნა, რომ მისი ხელმძღვანელობით ყველა პროექტი განსაკუთრებული გემოვნებითა და გამორჩეული ხარისხით კეთდება.
მოსწავლე-ახალგაზრდობის განახლებული სასახლის გახსნის ღონისძიების სტუმრებს სიტყვით მიმართეს დედაქალაქის მერმა კახა კალაძემ, კულტურის მინისტრმა თინათინ რუხაძემ და სასახლის ხელმძღვანელმა ნინა ყიფიანმა. მთავრობის მეთაურმა და თბილისის მერმა მოსწავლე-ახალგაზრდობის სასახლის განახლებული შენობა დაათვალიერეს.
სასახლის სარეაბილიტაციო სამუშაოები თბილისის განვითარების ფონდმა, პროექტ „ახალი ტფილისის“ ფარგლებში განახორციელა. პროექტის ღირებულებამ 56 მილიონ ლარს გადააჭარბა.
