8 დეკემბერს, „ნარკოტიკებისა და მასზე დამოკიდებულების ტენდენციების შემსწავლელმა საფრანგეთის ობსერვატორიამ“ (OFDT) ქვეყანაში უკანონო ნარკოტიკების ბრუნვის მოცულობისა და ღირებულების შესახებ ანგარიში გამოაქვეყნა. კვლევის თანახმად, 2010-დან 2023 წლამდე ნარკოტიკების ბაზრის ღირებულება თითქმის გასამმაგდა. ბაზარზე დომინირებენ კანაფი და კოკაინი, რომლებზეც გაყიდვების საერთო მოცულობის 90% მოდის.
კვლევის მიხედვით, „2023 წელს საფრანგეთში უკანონო ნარკოტიკების ბაზარი 6.8 მილიარდ ევროდ არის შეფასებული, მაშინ როდესაც 2010 წელს ბრუნვა 2.3 მილიარდ ევროს შეადგენდა“. ბაზარზე „წამყვან და ყველაზე ფართოდ მოხმარებად ნარკოტიკად“ რჩება კანაფი, რომლის გაყიდვებმა 2023 წელს დაახლოებით 2.7 მილიარდი ევროს მიაღწია. „ეს არის ბაზარი, რომელიც მოხმარების ტენდენციების შესაბამისად იცვლის კონფიგურაციას“, – აღნიშნულია კვლევაში.
„ბაზარზე კანაფი და კოკაინი დომინირებენ“
მიუხედავად იმისა, რომ კანაფი ყველაზე ფართოდ მოხმარებად ნარკოტიკად რჩება, კოკაინის ბაზარი, ღირებულების თვალსაზრისით, კანაფის ბაზარს მაინც აჭარბებს: კოკაინის გაყიდვები 3.1 მილიარდ ევროდ არის შეფასებული, ხოლო კანაფის – 2.7 მილიარდ ევროდ. არადა, საფრანგეთში კოკაინის მოხმარება 47 ტონას შეადგენს, კანაფისა კი – 397 ტონას. OFDT-ის წინა კვლევის თანახმად, ეს განსხვავება, მათი ფასებით აიხსნება: ერთი გრამი კოკაინი, საშუალოდ, 66 ევროდ იყიდება, ხოლო კანაფის საშუალო ფასი 8 ევროა.
ღირებულების თვალსაზრისით, ნარკოტიკების ბაზარზე კოკაინი და კანაფი დომინირებენ: 2023 წელს, „მთლიანი გაყიდვების თითქმის 90%“ მხოლოდ ამ ორ ნივთიერებაზე მოდიოდა. 2010-დან 2023 წლამდე პერიოდის მიმოხილვისას, OFDT ასევე აღნიშნავს სხვა ისეთი ფსიქოსტიმულატორების ბაზრის აფეთქებას, როგორიცაა ექსტაზი/MDMA, რომელიც 637%-ით გაიზარდა, და ამფეტამინები (470-პროცენტიანი ზრდა). სხვა ტენდენციებს შორის, კვლევაში აგრეთვე ხაზგასმულია „კრეკის ბაზრის ზრდა და ჰეროინის ბაზრის აღორძინება“.
„ნარკოტიკების გაყიდვების ზრდა წარმოაჩენს არა მხოლოდ მოხმარებული რაოდენობის მატებას, არამედ ეკონომიკურ გადაჯგუფებასაც, რაც ყველაზე მომგებიანი ნარკოტიკების (კოკაინი და სხვა ფსიქოსტიმულატორები) მზარდ მნიშვნელობაში გამოიხატება“, – წერენ კვლევის ავტორები, რომლებიც ამ რთული ბაზრის შიგნით „მრავალგვარ დინამიკაზე“ მიუთითებენ. ეს არის „საბითუმო და საცალო ფასების ცვლილებები, მოხმარების კონტექსტების დივერსიფიკაცია, საერთაშორისო ნაკადების გააქტიურება, სადისტრიბუციო არხების სტრუქტურირება, ასევე სულ უფრო დახვეწილი კომერციული სტრატეგიები“.
კვლევის მეთოდი:
კვლევა მიზნად ისახავდა უკანონო ნარკოტიკების მომხმარებელთა ხარჯების დადგენას, OFDT-ის მიერ ზრდასრულებსა და მოზარდებს შორის ჩატარებული რეპრეზენტატიული გამოკითხვების საფუძველზე. „ვინაიდან ამ შედეგების გამოსათვლელად მრავალი დაშვებაა საჭირო (მოხმარების სიხშირე, მოხმარებული რაოდენობა, ადგილობრივი ფასები, ნარკომანიის მკურნალობის გავლენა), ისინი ინტერპრეტირებული უნდა იყოს, როგორც მხოლოდ საორიენტაციო მონაცემები“, – აცხადებენ კვლევის ავტორები.