გერმანულმა მაუწყებელმა SWR-მა დაადგინა, რომ სანქცირებული რუსული არყის ხის მასალა კვლავ შედის ევროკავშირში. ამ მედიასაშუალების ჟურნალისტებმა საერთაშორისო სავაჭრო პლატფორმებზე თავი ტრეიდერებად გაასაღეს და რუსული შპონის შეძენის რამდენიმე შეთავაზება მიიღეს. გამყიდველებს შორის იყო გერმანულ-შვეიცარიული სათამაშოების მწარმოებლის „Hape International“-ის ჩინური ფილიალიც.
რუსეთის არყის ხის ტყეები მსოფლიოში უდიდესად მიიჩნევა. აგრესორი ქვეყნის მიერ შეთავაზებული საექსპორტო ხე-ტყე, 2022 წლამდე, სამშენებლო და ავეჯის საერთაშორისო ინდუსტრიებისთვის მთავარ ნედლეულს წარმოადგენდა. ეს სექტორი თავად რუსეთისთვისაც შემოსავლის ძალიან მნიშვნელოვან წყაროსწარმოადგენს. ამ ქვეყნის ხე-ტყის ბიზნესში მთავარი ფიგურაა ოლიგარქი ალექსეი მორდაშოვი, რომელიც ხე-ტყის სექტორში უმსხვილეს კომპანია „სვეზას“ აკონტროლებს და დიქტატორ ვლადიმერ პუტინის ნდობით აღჭურვილი პირია.
უკრაინაში რუსეთის შეჭრის შემდეგ, ევროკავშირმა როგორც რუსულ, ისე ბელარუსულ ხე-ტყეზე სანქციები დააწესა. თუმცა, ამ ქვეყნებში წარმოებული ხე-ტყის მასალის ევროკავშირში შედინება მაინც გაგრძელდა, ოღონდ, ისეთი ქვეყნების გავლით, როგორებიცაა თურქეთი, ყაზახეთი და ჩინეთი.
SWR-ის ჟურნალისტების მიერ გაანალიზებული მონაცემების თანახმად, „Hape International“-მა ბოლო ორი წლის განმავლობაში რუსეთიდან ჩინეთში რამდენიმე ათასი ტონა ხე-ტყე შეიტანა.
ამ კომპანიას ონლაინ ბაზრებზე გასაყიდად ხე-ტყის დიდი რაოდენობა აქვს გამოტანილი. „Hape International“-ი მყიდველებს არწმუნებს, რომ არყის ხე ნამდვილად რუსეთიდან არის და ამის დასადასტურებლად, ელექტრონულ წერილებსა და რუსი მომწოდებლების შესახებ ინფორმაციიას იშველიებს.
გერმანული მედიასაშუალება გერმანიაში „Hape International“-ის წარმომადგენლებს დაუკავშირდა, მაგრამ მათგან კომენტარის მიღება შეუძლებელი აღმოჩნდა. მათი თქმით, იურიდიულად დამოუკიდებელი შვილობილი ფირმის საქმიანობაზე კომენტარის გაკეთება კომპანიას არ შეუძლია, ხოლო მას შემდეგ, რაც SWR-ის ჟურნალისტები ჩინური შვილობილი კომპანიის წარმომადგენლებს შეეხმიანნენ, რუსული ხე-ტყის გაყიდვაზე „Hape International“-ის ყველა შეთავაზება ინტერნეტიდან გაქრა.
გერმანული მაუწყებელი ასევე იუწყება, რომ რუსეთის წინააღმდეგ სანქციების დაწესების მიუხედავად, ჩინეთიდან ევროკავშირში ხე-ტყის ექსპორტი გაიზარდა.
თავდაპირველად, ხე-ტყის ტვირთები, ძირითადად, პოლონეთის გავლით გადიოდა, მაგრამ ამ ქვეყნის ხელისუფლებამ მათი შეზღუდვის ზომები მიიღო. ამის შემდეგ, ესპანეთისა და პორტუგალიის გავლით ხე-ტყის იმპორტი რამდენჯერმე გაიზარდა.
გარემოსდაცვითი ორგანიზაციის „Earthsight“-ის წარმომადგენელმა, ტარა გენეშმა SWR-ს განუცხადა, რომ ყოველწლიურად ევროკავშირში დაახლოებით 1 მილიარდი ევროს ღირებულების სანქცირებული ხე-ტყე შედის.
ორგანიზაციის კვლევამ ადრე ასევე გამოავლინა, რომ ლატვიელი ხე-ტყის ტრეიდერი, შპს „Revival“-ი ასევე იყო ჩართული რუსეთიდან და ბელარუსიდან ევროკავშირში სანქცირებული შპონის იმპორტის სქემებში.
ამ სფეროს პოლონელმა ექსპერტებმა გაავრცელეს განცხადება, რომ ხე-ტყის ეს უკანონო პარტიები არა მხოლოდ საფრთხეს უქმნის ევროკავშირის ხე-ტყის ინდუსტრიის არსებობას, არამედ ევროკავშირის სანქციებისა და ხე-ტყის რეგულაციის აშკარა დარღვევას წარმოადგენს.