სახელმწიფო უსაფრთხოების სამსახურის ყოფილ უფროს გრიგოლ ლილუაშვილს, რომელიც გუშინ დააკავეს, წინასწარი პატიმრობა შეუფარდეს.
გადაწყვეტილება დღეს, 24 დეკემბერს გამოაცხადა თბილისის საქალაქო სასამართლოს მოსამართლე არსენ კალატოზიშვილმა.
ლილუაშვილი სასამართლო სხდომას არ დასწრებია. მისმა ადვოკატმა რობერტ გრიგალაშვილმა წაიკითხა ლილუაშვილის წერილი, რომელშიც ყოფილი მაღალჩინოსანი წერს:
„მიმაჩნია, რომ 24 საათში ვერ შევძლებ საქმის მასალების გაცნობას. გამოვხატავ სასამართლოს პატივისცემას, მაგრამ სანამ არ გავეცნობი საქმის მასალებს, არ მაქვს სურვილი დავესწრო სხდომას“.
სხდომა 20:40 საათზე დასრულდა. შემდეგი სასამართლო სხდომა 16 თებერვალს დაინიშნა.
ამასთან, სასამართლო პროცესი დაიხურა.
სხდომის დახურვის შუამდგომლობა პროკურორმა მარიამ ბერძენიშვილმა დააყენა, რასაც ადვოკატი შეეწინააღმდეგა:
„ჩვენ ვართ ცოტა სხვა მოცემულობაში… ბრალდების მხარე ითხოვს სხდომის დახურვას იმ მოტივით, რომ არსებობენ მოწმეები, რომელთა ვინაობის გამხელაც არ სურთ… გუშინდელ ბრიფინგზე დასახელდა საქმეები და წრე. ამიტომ ამ საბაბითა არ მიმაჩნია სხდომის დახურვა მიზანშეწონილი“.
პასუხად პროკურორმა ბერძენიშვილმა თქვა: „ქოლ-ცენტრების ნაწილში გამოკითხული არიან ადამიანები, რომლებიც მნიშვნელოვან ინფორმაციას გვაწვდიან და არ დასახელებულან გენერალური პროკურორის ბრიფინგზე“.