ლონდონის პოლიციამ ხანძრის პირველი მსხვერპლის ვინაობა გაასაჯაროვა. ის 23 წლის სირიელი ლტოლვილი მუჰამედ ალჰაჯალია, რომელიც ლონდონის უნივერსიტეტში ინჟინერიის ფაკულტეტზე სწავლობდა.
ხანძრის დროს მან სახლიდან დროულად გაქცევა ვერ მოასწრო. ინფორმაციას ავრცელებს Sky News-ი.
„მუჰამედი სირიის ომს გადაურჩა, მაგრამ ლონდონში გარდაიცვალა. ბრიტანეთმა ვერ უზრუნველყო მისი უსაფრთხოება.“ – თქვა მუჰამედ ალჰაჯალის ძმამ BBC-ის კორესპონდენტთან ინტერვიუში.
ლონდონში, 24-სართულიან საცხოვრებელ სახლში მომხდარი ხანძრის შედეგად დაღუპულთა რიცხვი 17-მდე გაიზარდა. პოლიციაში აცხადებენ, რომ მსხვერპლის რიცხვი, სავარაუდოდ, გაიზრდება, რადგან რამდენიმე ათეული ადამიანი დაკარგულად ითვლება. ამ ეტაპზე საავადმყოფოებში 70 ადამიანი მკურნალობს.
ხანძარი ლონდონის ცენტრში მდებარე საცხოვრებელ სახლში ოთხშაბათს ღამით გაჩნდა. არსებული ინფორმაციით, ხანძრის გაჩენის დროს შენობაში 600 ადამიანი იმყოფებოდა.