ევროსაბჭოში საქართველოს პარლამენტის დელეგაციის წევრმა გუგული მაღრაძემ სტრასბურგში, ევროსაბჭოს კომიტეტების სხდომებში მიიღო მონაწილეობა.
გუგული მაღრაძე ბიოეთიკის კომიტეტის სხდომაზე, როგორც ევროსაბჭოს სოციალურ საკითხთა კომიტეტის სპეციალური მომხსენებელი იყო მიწვეული. სხდომაზე განხილვის ძირითადი საკითხი ევროსაბჭოს 22 აპრილის პლენარულ სხდომაზე წარდგენილი მოხსენების საფუძველზე მიღებული ევროსაბჭოს რეზოლუცია იყო, რომელიც ფსიქონერვული პრობლემების მქონე პირთა იძულებით განთავსებასა და მკურნალობასთან დაკავშირებით ბიოეთიკის კომიტეტის შემდგომი მუშაობის სტრატეგიას ეხებოდა.
დისკუსიის შედეგად, კომიტეტმა მიიღო გადაწყვეტილება გააგრძელოს საკითხზე მუშაობა, რაშიც გუგული მაღრაძე, როგორც მომხსენებელი იქნება ჩართული. გუგული მაღრაძემ, როგორც კომიტეტის წევრმა, ასევე მონაწილეობა მიიღო ევროსაბჭოს სოციალურ საკითხთა ჯანდაცვის და მყარი განვითარების კომიტეტის სხდომაში. სხდომაზე განხილული იყო ისეთი საკითხები, როგორიცაა შემოსავლებში უთანაბრობის ზრდა, როგორც სოციალური შეკავშირებულობისადმი მუქარა, საგზაო უსაფრთხოება ევროპაში, როგორც ჯანდაცვის პრიორიტეტი, ბავშვების გადაჭარბებული სექსუალიზაციის პრობლემები, ხანდაზმულ ადამიანთა უფლებების და მათზე ზრუნვის სოციალური ვალდებულებები.