ევროპული ქვეყნების ჯგუფი, რომელსაც გაერთიანებული სამეფო და გერმანია ხელმძღვანელობენ, გრენლანდიაში თავისი სამხედრო ყოფნის გაძლიერების გეგმას განიხილავს.
სააგენტო „ბლუმბერგის“ მიერ კვირას გავრცელებული ინფორმაციით, გერმანია, არქტიკული რეგიონის დასაცავად, ნატო-ს ერთობლივი მისიის შექმნის წინადადებით გამოვა.
ინიციატივის მიზანია აშშ-ის პრეზიდენტ დონალდ ტრამპისთვის იმის ჩვენება, რომ ევროპის კონტინენტი არქტიკის უსაფრთხოების საკითხს სერიოზულად ეკიდება.
ბერლინის ინიციატივას წინ უძღოდა გრენლანდიის შეძენის განზრახვის ტრამპის მხრიდან კიდევ ერთხელ დადასტურება და გაფრთხილება, რომ „უნდათ თუ არა ეს“, ის ამას მაინც გააკეთებს.
აშშ-ის პრეზიდენტი ამტკიცებს, რომ შეერთებულ შტატებს გრენლანდიის კონტროლი სჭირდება, რათა მომავალში რუსეთის ან ჩინეთის მიერ კუნძულის ოკუპაცია თავიდან აიცილოს. ტრამპი ასევე ირწმუნება, რომ რუსული და ჩინური გემები გრენლანდიის სიახლოვეს ოპერირებენ, რასაც სკანდინავიური ქვეყნები უარყოფენ.
ასეთ ვითარებაში, შაბათს „ტელეგრაფმა“ გაავრცელა ინფორმაცია, რომ გაერთიანებული სამეფოსა და ევროპის სხვა ქვეყნების სამხედრო ხელმძღვანელები ადგენდნენ გეგმებს გრენლანდიაში ნატო-ს შესაძლო მისიისთვის, რათა არქტიკული კუნძული ჩინეთისა და რუსეთის საფრთხეებისგან დაიცვან და ამ გზით ტრამპის შეშფოთება გააქარწყლონ.
„სქაი ნიუსის“ კითხვაზე, განიხილავდა თუ არა გაერთიანებული სამეფო კუნძულზე ჯარების გაგზავნას, ბრიტანეთის ტრანსპორტის მინისტრმა ჰაიდი ალექსანდერმა განაცხადა, რომ მოლაპარაკებები იმის შესახებ, თუ როგორ შეაჩერონ რუსეთის პრეზიდენტი ვლადიმერ პუტინი არქტიკაში, „ჩვეულ რეჟიმში მიმდინარეობს“.
„არქტიკა, რუსეთისა და ჩინეთის ფაქტორის გათვალისწინებით, სულ უფრო სადავო გეოპოლიტიკური რეგიონი ხდება. ამიტომ, ლოგიკურია, რომ ჩვენ ვესაუბრებით ნატოელ მოკავშირეებს იმაზე, თუ რისი გაკეთება შეგვიძლია არქტიკულ წრეში რუსული აგრესიის შესაჩერებლად“, – განაცხადა ალექსანდერმა.
„ტელეგრაფის“ ცნობით, ევროპულ ქვეყნებს იმედი აქვთ, რომ არქტიკაში ნატო-ს სამხედრო ყოფნის გაზრდა ტრამპს გრენლანდიის ანექსიის გეგმებზე უარს ათქმევინებს.
გერმანიის საგარეო საქმეთა მინისტრმა, იოჰან ვადეფულმა კვირას განაცხადა, რომ ჩრდილოეთ ატლანტიკაში უსაფრთხოებასთან დაკავშირებული შეშფოთებები შეერთებულმა შტატებმა ნატო-ს ფარგლებში უნდა განიხილოს.
„თუ აშშ-ის პრეზიდენტი ინფორმირებულია რეგიონში რუსული ან ჩინური გემებისა და წყალქვეშა ნავების მხრიდან მომდინარე საფრთხეების შესახებ, ჩვენ, რა თქმა უნდა, შეგვიძლია ამაზე პასუხები ერთად ვიპოვოთ“, – აღნიშნა ვადეფულმა ვაშინგტონისკენ მიმავალ გზაზე ისლანდიაში გაჩერებისას.
„გზაგასაყარზე ვართ“
დანიის პრემიერ-მინისტრი, მეტე ფრედერიკსენი ვაშინგტონს ნატო-სთვის ზურგის შექცევაში ადანაშაულებს და ამბობს, რომ დანია „გარდამტეხ მომენტში“ იმყოფება.
პარტიის ლიდერებს შორის კვირას გამართული დებატების დროს, დანიის პრემიერ-მინისტრმა აღნიშნა, რომ მისი ქვეყანა „გზაგასაყარზეა“.
„ჩვენ გზაგასაყარზე ვართ და ეს გადამწყვეტი მომენტია. სასწორზე იმაზე მეტი დევს, ვიდრე ერთი შეხედვით ჩანს. თუ ამერიკელები ნამდვილად შეაქცევენ ზურგს დასავლურ ალიანსს, ზურგს შეაქცევენ ჩვენს თანამშრომლობას ნატო-ში, მოკავშირის დამუქრების გზით – რაც აქამდე არასდროს გვინახავს – მაშინ ყველაფერი გაჩერდება“, – განაცხადა ფრედერიკსენმა.
პარალელურად, აშშ-ის სახელმწიფო მდივანმა მარკო რუბიომ დაადასტურა, რომ უახლოეს დღეებში დანიის ლიდერებს შეხვდება, ამასთან, ხაზგასმით აღნიშნა, რომ ტრამპის მიზნებიდან უკან არ დაიხევს.
გრენლანდიის მთავრობის ცნობით, მონაწილეობას მიიღებს ამ შეხვედრაში და იმედოვნებს, რომ ის ვაშინგტონთან ურთიერთობების ნორმალიზებას მოემსახურება.
https://www.rtp.pt/noticias/mundo/berlim-e-londres-discutem-envio-de-tropas-para-a-gronelandia_n1709408