ელ-ხიამთან (ლიბანი) არსებულ უსაფრთხოების ზონაში შესულმა ისრაელის ტანკებმა იქ გაერო-ს ეგიდით მყოფ ესპანურ პატრულს ესროლეს.
ისრაელის ეს ქმედება გაერო-ს უშიშროების საბჭოს რეზოლუციებს არღვევს.
ისრაელის არმიამ ლიბანში მყოფ გაერო-ს სამშვიდობო მისიის ესპანელ წევრებს ტანკებიდან ცეცხლი გაუხსნა, რასაც მსხვერპლი და ზიანი არ მოჰყოლია. ესპანეთის თავდაცვის სამინისტროს განცხადებით, თავდასხმის სამიზნე ლიბანში გაერო-ს დროებითი ძალების (UNIFIL) აღმოსავლეთ სექტორის ბატალიონის პატრული იყო.
თავდაცვის გენერალური შტაბის ინფორმაციით, თავდასხმა ორშაბათს, დაახლოებით 16:30 საათზე, ქალაქ ელ-ხიამის მახლობლად მოხდა. „ისრაელის სამმა ტანკმა პოზიციები დაიკავა ბუფერული ზონის ჩრდილოეთით, UNIFIL-ის აღმოსავლეთ ბრიგადის ესპანური ბატალიონის (SPANBATT) პასუხისმგებლობის ზონაში, რომელსაც გენერალი ანტონიო ბერნალ მარტინი ხელმძღვანელობს“.
ბუფერული ტერიტორია წარმოადგენს უსაფრთხოების ზონას იმ პოზიციების გარშემო, რომლებიც ისრაელის შეიარაღებულ ძალებს ლიბანის ტერიტორიაზე უკავიათ.
„ესპანური პატრული ადგილზე მივიდა ელ-ხიამის სამხრეთით მყოფ ტანკებზე დასაკვირვებლად, რადგან ისინი ბუფერული ზონის გარეთ იმყოფებოდნენ. ამ მომენტში ისრაელის ტანკებმა სამჯერ გაისროლეს, ჭურვები პატრულისგან 150 და 380 მეტრში ჩამოვარდა. ესპანური ბატალიონის პატრული უსაფრთხო ზონაში გაიყვანეს, რის შემდეგაც ისრაელის ტანკები ბაზაზე დაბრუნდნენ. ამის შემდეგ, მარჯაიუნში მდებარე მიგელ დე სერვანტესის ბაზაზე ესპანური პატრულიც შემდგომი ინციდენტების გარეშე დაბრუნდა“, – ნათქვამია გენშტაბის განცხადებაში.
UNIFIL-ის ძალები, მათ შორის ესპანური კონტინგენტი, მშვიდობისა და სტაბილურობის შენარჩუნებას სამხრეთ ლიბანში ცდილობენ, სადაც ისრაელსა და ლიბანურ შიიტურ ორგანიზაცია „ჰეზბოლას“ შორის შეტაკებები მიმდინარეობს. გაერო-ს „ცისფერჩაფხუტიანები“, სავარაუდოდ, ლიბანის რეგულარულ არმიასა და ისრაელის არმიასთან კოორდინაციაში არიან.
„მათ წინააღმდეგ მიმართული ნებისმიერი მტრული ქმედება გაერო-ს უშიშროების საბჭოს 1701-ე რეზოლუციის სერიოზულ დარღვევას წარმოადგენს და საფრთხეს უქმნის სამშვიდობო ძალების უსაფრთხოებას“, – ნათქვამია ესპანეთის შეიარაღებული ძალების განცხადებაში.
განმეორებითი თავდასხმები
ეს არ არის პირველი შემთხვევა, როდესაც ისრაელმა ლიბანში განლაგებულ „ცისფერჩაფხუტიანებს“ ცეცხლი გაუხსნა. გაერო-ს მშვიდობისმყოფელთა პოზიციებს ცეცხლი მათ 2024 წლის ოქტომბერშიც გაუხსნეს და დაარტყეს UNIFIL-ის მთავარ ბაზას ნაკურაში, რის შედეგად ორი ინდონეზიელი ჯარისკაცი დაშავდა.
ისრაელი რეგულარულად ესხმის თავს ლიბანს 2023 წლის 7 ოქტომბრის შემდეგ, როდესაც „ჰამასი“ და ღაზაში მოქმედი პალესტინური დაჯგუფებები სამხრეთ ისრაელს დაესხნენ თავს. მოგვიანებით, „ჰეზბოლამ“, ღაზაში მყოფი პალესტინელების მხარდასაჭერად, ლიბანიდან თავდასხმები წამოიწყო, რომლის მეომრებიც ისრაელმა, საპასუხო თავდასხმის დროს, მასობრივად გაანადგურა.
ისრაელმა და „ჰეზბოლამ“ ცეცხლის შეწყვეტის შეთანხმებას 2024 წლის ნოემბერში მიაღწიეს, თუმცა ისრაელი მას შემდეგაც აგრძელებს ლიბანური შიიტური ორგანიზაციის სავარაუდო სამიზნეების დაბომბვას. ცეცხლის შეწყვეტის შეთანხმება ითვალისწინებს სამხრეთ ლიბანიდან ყველა შეიარაღებული დაჯგუფების გაყვანას, მათი დისლოკაციის ადგილზე ლიბანის არმიის განლაგებას და „ჰეზბოლას“ დემილიტარიზაციას.
https://www.rtve.es/noticias/20260113/israel-dispara-contra-unidad-cascos-azules-espanoles-libano-sin-causar-victimas/16892071.shtml