„ემაართან“ ერთად ტრამპის გლობალური ბრენდიც იქნება დამატებითი ინდიკატორი, რომ საქართველო არის იდეალური გარემო მსხვილი ინვესტიციებისთვის, – განაცხადა გადაცემაში „იმედი LIVE“ ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა.
დეპუტატი გამოეხმაურა ინფორმაციას, რომ „ტრამპის ორგანიზაცია“ და მისი პარტნიორები თბილისში Trump Tower Tbilisi-ს მშენებლობას გეგმავენ.
„ეს ძალიან სასიხარულო ამბავია ჩვენი ქვეყნისთვის. როდესაც „ემაარ ჯგუფმა“ გადაწყვიტა საქართველოში შემოსვლა და გაფორმდა ხელშეკრულება, უამრავი კრიტიკა მოვისმინეთ ჩვენი ქვეყნის არაკეთილმოსურნეებისგან. ჩვენ ყოველთვის ხაზს ვუსვამდით „ემაარის“ ინვესტიციის ირიბ ეფექტსაც და ვაცხადებდით, რომ როდესაც ასეთი მსხვილი გლობალური მოთამაშე შემოდის ქართულ ბაზარზე, ეს არის ტრიგერი, ინდიკატორი დანარჩენი მსხვილი ჯგუფებისთვისაც, რომ საქართველოში იდეალური საინვესტიციო გარემოა. სწორედ ამაზე მეტყველებს ის, რომ სულ რამდენიმე თვეა გასული და უკვე ტრამპის ოჯახის მფლობელობაში არსებული უმსხვილესი ბრენდი შემოდის ინვესტიციით. ესეც თავის მხრივ შექმნის დამატებით სამუშაო ადგილებს, შემოიტანს ძალიან დადებით წვლილს ჩვენს ეკონომიკაში და „ემაართან“ ერთად ტრამპის გლობალური ბრენდიც იქნება დამატებითი ინდიკატორი, რომ საქართველო არის იდეალური გარემო მსხვილი ინვესტიციებისთვის და ეს რა თქმა უნდა მოიზიდავს დამატებით ბიზნესებს“, – განაცხადა მაჭავარიანმა.
გლობალური ფუფუნების ცხოვრების ახალი სტანდარტი – ტრამპის ორგანიზაციამ არჩევანი საქართველოს სტაბილურ ბიზნეს და საინვესტიციო გარემოზე შეაჩერა. მსოფლიოს ერთ-ერთი ყველაზე პრესტიჟული ორგანიზაცია პარტნიორებთან ერთად, თბილისში 70-სართულიან ცათამბჯენს ააშენებს. „ტრამპ-თაუერის“ შემდეგ, თბილისი აღმოსავლეთ ევროპასა და აზიაში, საერთაშორისო ბიზნესცენტრი გახდება. პროექტში ტრამპის ორგანიზაციასთან ერთად ჩართული არიან მასშტაბური ინვესტორი კომპანიებიც. ეს იქნება ტრამპის ბრენდის პირველი პროექტი რეგიონში.