საფრანგეთის პრეზიდენტმა, ემანუელ მაკრონმა ირანელ კოლეგასთან, მასუდ პეზეშკიანთან მოლაპარაკებების შემდეგ, ჰორმუზის სრუტის გახსნისკენ მოუწოდა.
„ყველა მხარემ დაუყოვნებლივ და ყოველგვარი პირობების გარეშე უნდა მოხსნას სრუტის ბლოკადა“, – განაცხადა მან.
„ჩვენ მყარად უნდა დავუბრუნდეთ ნაოსნობის სრული თავისუფლების იმ რეჟიმს, რომელიც კონფლიქტამდე არსებობდა“, – აღნიშნა მაკრონმა.
მაკრონმა ასევე მოუწოდა სხვა მხარეებს, განიხილონ საფრანგეთისა და დიდი ბრიტანეთის მიერ ინიცირებულ მრავალეროვნულ მისიაში გაწევრიანება, რომლის მიზანიც ამ საკვანძო საზღვაო გზაზე ნაოსნობის უსაფრთხოების უზრუნველყოფაა.
„ბოლოდროინდელი მოვლენები ნათლად ადასტურებს, თუ რამდენად სასარგებლო იქნებოდა მსგავსი მისია“, – დასძინა მან.
„ირანის პრეზიდენტს მოვუწოდე, ხელიდან არ გაუშვას ეს შესაძლებლობა. ასევე ვაპირებ, აღნიშნული საკითხი პრეზიდენტ ტრამპთან განვიხილო. სრუტეში სიმშვიდის დაბრუნება ხელს შეუწყობს პროგრესს მოლაპარაკებებში ბირთვულ და ბალისტიკურ საკითხებზე, ისევე როგორც რეგიონულ ვითარებასთან დაკავშირებით“, – აღნიშნა მაკრონმა.