ამერიკელი მილიარდერი, კომპანიების „ტესლას“, „სფეის იქსის“ და სოციალურ ქსელ „იქსის“ მფლობელი ილონ მასკი მსოფლიოს პირველი ტრილიონერი გახდა.
მასკის ქონების უმეტესი ნაწილი ამჟამად „სფეის იქსში“ არის მობილიზებული, სადაც დაახლოებით 866 მილიარდი დოლარის ღირებულების წილი ეკუთვნის.
კომპანიის დოკუმენტებზე დაყრდნობით, „როიტერის“ გამოთვლებით, „ტესლასთან“ და მის სხვა ქონებასთან ერთად, მისი წმინდა ქონება 12 ივნისს აქციებით ვაჭრობის დაწყებისას 1.1 ტრილიონ დოლარს გადააჭარბებს. ეს მაჩვენებელი მოიცავს აქციებს, რომლებიც დროთა განმავლობაში მფლობელობაში გადავა.
54 წლის მასკი სამხრეთ აფრიკის ქალაქ პრეტორიაში დაიბადა, კანადელი დედისა და სამხრეთ აფრიკელი მამის ოჯახში. სწავლობდა პენსილვანიის უნივერსიტეტში, რომელიც 1997 წელს დაამთავრა. „ტესლას“ აღმასრულებელი დირექტორის თანამდებობა 2008 წელს დაიკავა იმ რწმენით, რომ ელექტრომობილებს შეეძლოთ მაღალი წარმადობისა და პროგრამული უზრუნველყოფის მახასიათებლების შერწყმა, რაც გლობალური საავტომობილო ინდუსტრიის ხელახლა განსაზღვრას შეუწყობდა ხელს. ავტოინდუსტრიის ზოგიერთი დამკვირვებლის თქმით, „ტესლას“ წარმატებამ და მისი ტრილიონ დოლარზე მეტმა საბაზრო კაპიტალიზაციამ, ტრადიციულ ავტომწარმოებლებს ელექტრომობილებზე გადასვლაში დაეხმარა. „ტესლას“ და „სფეის იქსის“ გარდა, მასკი კიდევ ხუთი კომპანიის თანადამფუძნებელია, მათ შორისაა გვირაბების გაყვანის სტარტაპ „ბორინგ ქომფანი“ და ტვინის იმპლანტების მწარმოებელი „ნეურალინკი“.