საქართველოში, უპირველესად ყოვლისა, დაცული უნდა იყოს ქართველი ხალხის ინტერესები. ნიკა გვარამიას მხრიდან ასეთი ფორმულირება და საკუთარი ქვეყნის მიმართ მიდგომა აჩვენებს, რომ ეს ადამიანი უბრალოდ არის გამზადებული ვასალი, რომელიც თავს სთავაზობს სხვადასხვა უცხოურ ქვეყანას, რომ მათ ინტერესებს მოემსახუროს, – ამის შესახებ საქართველოს პარლამენტის თავმჯდომარე შალვა პაპუაშვილმა კითხვაზე საპასუხოდ განაცხადა.
პაპუაშვილს ჟურნალისტმა კითხვა დაუსვა: „კრიტიკა ისმის ხოლმე საქართველო-ჩინეთის ურთიერთობებზე, სტრატეგიულ პარტნიორობაზე. ასევე აშშ-თან ურთიერთობასთან დაკავშირებით ვნახეთ ნიკა გვარამიას მიერ შეკვეთილი სტატია, სადაც საუბარია, რომ საქართველოში ამერიკის ინტერესები დაცული არ არის და ვაშინგტონმა არ უნდა მოახდინოს ურთიერთობის ნორმალიზაცია. რას მიანიშნებს თქვენთვის ასეთი განცხადებები და სტატიები?“
პაპუაშვილის თქმით, პირველ რიგში, საქართველო უნდა მოქმედებდეს ქართველი ხალხის ინტერესების შესაბამისად.
„რა დამოკიდებულებაა საკუთარი ქვეყნის მიმართ, რომ საქართველო ვისი ინტერესების შესაბამისად მოქმედებს თუ არ მოქმედებს? პირველ რიგში, საქართველო უნდა მოქმედებდეს ქართველი ხალხის ინტერესების შესაბამისად და ამას აკეთებს „ქართული ოცნების“ ხელისუფლება. ვინმეს თუ სხვა უნდა, მაშინ ხელისუფლებაში უნდა მოიყვანონ „ნაცები“ და მოემსახურებიან არა ქართველი ხალხის, არამედ სხვა ხალხების ინტერესებს. ვიდრე „ქართული ოცნება“ არის საქართველოს ხელისუფლებაში, ამ ქვეყანაში გატარდება ქართველი ხალხის ინტერესები. ეს არის ამოსავალი წერტილი სუვერენულ ქვეყნებს შორის საერთო ინტერესების ძიებისა. ეს არის, როგორც ჩვენ გვესახება და როგორც აშშ-ის ახალ ადმინისტრაციისგან ვიღებთ სიგნალებს, როგორ ყალიბდება ალიანსები – ყველა ქვეყანა, უპირველესად ყოვლისა, აცხადებს, რომ ჯერ არის საკუთარი ეროვნული ინტერესი და შემდეგ ორი ქვეყანა საკუთარ ეროვნულ ინტერესებზე დაფუძნებით ეძებს, სად არის საერთო ინტერესები. ეს არის ზუსტად ის, რასაც საქართველო სთავაზობს ყველა ქვეყანას ურთიერთობაში და არა დაქვემდებარებას, გამოკითხვას, ვის რა უნდა საქართველოსგან და შემდეგ სხვებისთვის საკუთარი ქვეყნის, ქვეყნის ინტერესების მენიუსავით შეთავაზებას.
რადიკალურ ოპოზიციას რაც აწყობს, ეს არის მუდმივი დაძაბულობა. ამას ცდილობდნენ ჩვენი ომში ჩათრევით, ნებისმიერი თემით მუდმივი დაძაბულობის შემოტანით. არ არსებობს თემა, ისინი არ შეეცადონ, რომ დაძაბულობისთვის გამოიყენონ. რადიკალურ ოპოზიციაზე როდესაც ვსაუბრობთ, არ დაგვავიწყდეს, რომ საერთო ჯამში, არაფერ შუაში არიან რადიკალური ოპოზიციის წარმომადგენლები, ისინი არიან მხოლოდ თოჯინები სხვის ხელში და გარედან ათამაშებენ. მთავარი მიზანი არის საქართველოში ხელისუფლების ჩანაცვლება, მოყვანა ვასალების, რომლებიც უპირობოდ შეასრულებენ სხვების დავალებებს“, – განაცხადა შალვა პაპუაშვილმა.