თეთრ სახლში გამართულ შეხვედრაზე, აშშ-ის პრეზიდენტმა, დონალდ ტრამპმა ნატოს გენერალური მდივნის, მარკ რუტეს მიმართ მხარდაჭერა გამოხატა, თუმცა ამავდროულად, მკაცრად გააკრიტიკა ალიანსის სხვა წევრი ქვეყნები.
ტრამპმა რუტეს „დიდი ლიდერი“ და „შესანიშნავი გენერალური მდივანი“ უწოდა და აღნიშნა, რომ მას რუტეს მიმართ დიდი პატივისცემა აქვს. პრეზიდენტის თქმით, ნატოს ხელმძღვანელი რომ სხვა ყოფილიყო, შესაძლოა, დღევანდელი შეხვედრაც არ შემდგარიყო.
პრეზიდენტმა ხაზი გაუსვა იმას, რომ აშშ-მა ნატოს მოკავშირეების მხრიდან იმედგაცრუება განიცადა.
„ამ საკითხში დახმარება საერთოდ არ გვჭირდებოდა. ჩვენ ისინი [ირანი] ფაქტობრივად პირველივე კვირაში გავანადგურეთ. თუმცა, კარგი იქნებოდა, მათ რომ ეთქვათ: „ჩვენ გვსურს დახმარება“. დახმარება არც გვჭირდებოდა, მაგრამ კარგი იქნებოდა, ეს მაინც ეთქვათ. მათ ეს არ უთქვამთ. […] იმედგაცრუებული ვიყავი იტალიით, იმედგაცრუებული ვიყავი გაერთიანებული სამეფოთი – ის [სტარმერი] ახლა არ არის და იცით, მას ბევრი პრობლემა ჰქონდა – მაგრამ იმედგაცრუებულები ვიყავით გაერთიანებული სამეფოთი, იმედგაცრუებულები ვიყავით გერმანიითა და საფრანგეთით. უმეტესობით იმედგაცრუებულები ვიყავით. ესპანეთი საშინელებათა შოუა – ესპანეთი საშინელია. ვგულისხმობ იმას, რომ მათ არაფრის გადახდა არ სურთ. ისინი ფიქრობენ, რომ „უფასო მგზავრები“ არიან“, – დასძინა ტრამპმა.