აშშ-ის სენატის საგარეო ურთიერთობათა კომიტეტმა დაამტკიცა ორპარტიული კანონპროექტი, სახელწოდებით „მოწინააღმდეგის გავლენის, დეზინფორმაციისა და დაფარული უცხოური დაფინანსების აღკვეთის შესახებ“.
კანონპროექტის ინიციატორმა და კომიტეტის თავმჯდომარემ, სენატორმა ჯიმ რიშმა სხვა სენატორებთან ერთად კანონის მნიშვნელობაზე გაამახვილა ყურადღება. ინიციატივას მხარს უჭერენ სენატორები: ჯონ კორნინი, შელდონ უაიტჰაუსი, ტომ ტილისი, ჩაკ გრესლი, დებ ფიშერი, პიტერ უელში და ჯონ კენედი.
„წლების განმავლობაში, შეერთებული შტატების უდიდესი მოწინააღმდეგეები იყენებდნენ აშშ-ის ლობისტური კანონმდებლობის ხარვეზებს, რათა ზეგავლენა მოეხდინათ მთავრობის მაღალჩინოსნებზე და წინ წაეწიათ თავიანთი გეოპოლიტიკური მიზნები“, – განაცხადა სენატორმა რიშმა. „ცნობილი მაგალითები მოიცავს რუსეთის მცდელობებს, თავიდან აეცილებინა სანქციები მისი გაზსადენისთვის „ჩრდილოეთის ნაკადი 2“, ასევე ჩინური სათვალთვალო ფირმა Hikvision-ის მცდელობებს, თავი აერიდებინა სანქციებისთვის. ეს დებულება დახურავს მთავარ ხარვეზებს, რათა უზრუნველყოფილი იყოს შეერთებულ შტატებში მავნე უცხოური ლობისტური საქმიანობის გამჭვირვალობა და ანგარიშვალდებულება“.
„ამერიკული პოლიტიკა არავითარ შემთხვევაში არ უნდა ასახავდეს იმ უცხოელი მოწინააღმდეგეების ხელწერას, რომლებიც აქტიურად მუშაობენ სასწორის თავიანთ სასარგებლოდ გადახრისა და ჩვენი ინტერესების შელახვისთვის“, – განაცხადა სენატორმა კორნინმა. „ისეთი ქვეყნების მავნე გავლენის მოხდენის მცდელობების გამოვლენით, როგორებიცაა ჩინეთი ან რუსეთი, ეს კანონმდებლობა უკეთესად დაიცავს აშშ-ის გადაწყვეტილების მიღების პროცესს“.
„როდესაც უცხოელი მოწინააღმდეგეები კანონში არსებული ხარვეზების გამოყენებით ლობირებენ კონგრესს, ისინი პირდაპირ საფრთხეს უქმნიან ჩვენს დემოკრატიას“, – განაცხადა სენატორმა უაიტჰაუსმა. „ეს ორპარტიული კანონმდებლობა დიდი ხანია დაგვიანებულია და ხელს შეუწყობს არარეგისტრირებული უცხოელი აგენტების მიერ ამერიკულ პოლიტიკაზე ზეწოლის განხორციელების აღკვეთას“.
„ჩინეთისა და რუსეთის მსგავს უცხოელ მოწინააღმდეგეებს არასოდეს უნდა მიეცეთ უფლება, ფარულად მოახდინონ გავლენა ამერიკულ პოლიტიკაზე ან საზოგადოებრივ აზრზე“, – განაცხადა სენატორმა ტილისმა. „ამაყი ვარ, რომ ამ ორპარტიულმა კანონმდებლობამ კომიტეტში მხარდაჭერა მიიღო, რათა შევძლოთ სახიფათო ხარვეზების აღმოფხვრა და ჩვენი ეროვნული უსაფრთხოების განმტკიცება“.
„ამერიკელებმა უნდა იცოდნენ, ცდილობს თუ არა უცხოური მთავრობა შეერთებულ შტატებში პოლიტიკურ გადაწყვეტილებებზე გავლენის მოხდენას“, – განაცხადა სენატორმა გრესლიმ. „მივესალმები სენატის საგარეო ურთიერთობათა კომიტეტის გადაწყვეტილებას ჩვენი ორპარტიული კანონპროექტის წინ წაწევასთან დაკავშირებით. ეს კანონი აღმოფხვრის ხარვეზებს და უზრუნველყოფს, რომ არარეგისტრირებულმა უცხოელმა აგენტებმა აღარ შეძლონ ამერიკულ პოლიტიკაში ფარულად ჩარევა“.
„ჩვენი უცხოელი მოწინააღმდეგეები ბევრს მუშაობენ იმისათვის, რომ გავლენა მოიპოვონ აშშ-ის პოლიტიკაზე“, – განაცხადა სენატორმა ფიშერმა. „ჩვენ გვჭირდება FARA-ს რეფორმირება, რათა უკეთ შევძლოთ იმ პირების გამოვლენა, რომლებიც ჩუმად მუშაობენ უცხოური მთავრობების სასარგებლოდ. მადლობას ვუხდი სენატორ კორნინს ამ მნიშვნელოვანი კანონპროექტის ლიდერობისთვის – მოდით, ბოლომდე მივიყვანოთ ეს საქმე“.
„იმის გათვალისწინებით, რომ მსოფლიოში დეზინფორმაციისა და მცდარი ინფორმაციის გავრცელების ერთ-ერთი ყველაზე მაღალი მაჩვენებელი გვაქვს, გასაკვირი არ არის, რომ ამერიკელი ხალხი კარგავს ნდობას ჩვენი დემოკრატიული ინსტიტუტების მიმართ“, – განაცხადა სენატორმა უელშმა. „უცხოელმა მოწინააღმდეგეებმა ეს უნდობლობა კიდევ უფრო გააღრმავეს აშშ-ის ლობისტური კანონმდებლობის ხარვეზების გამოყენებით, რათა შეერყიათ აშშ-ის გადაწყვეტილების მიღების პროცესი და მოეხდინათ გავლენა პოლიტიკაზე. კონგრესმა აუცილებლად უნდა მიიღოს ეს ორპარტიული კანონმდებლობა, რათა დაიხუროს ეს ხარვეზები, დაცული იქნას ჩვენი ეროვნული უსაფრთხოება და პასუხი მოეთხოვოთ მავნე ქმედებების განმახორციელებლებს“.
„უცხოეთის აგენტებს, რომლებიც ჩვენი მოწინააღმდეგეებისთვის, როგორიცაა ჩინეთი და ირანი, მუშაობენ, არ უნდა შეეძლოთ ჩრდილში დამალვა, როდესაც ცდილობენ ამერიკული პოლიტიკა საკუთარ ნებაზე დააყენონ. თუ გიხდიან ჩვენი მტრების ინტერესების გატარებაში, ამერიკელმა ხალხმა უნდა იცოდეს, ვინ აწერს ხელს ჩეკებს და რას აკეთებთ. ეს კანონი უზრუნველყოფს სრულ გამჭვირვალობას“, – განაცხადა სენატორმა კენედიმ.