ქართული მხარე ვარაუდობდა, რომ თვითმფრინავი დღეს ერთი წრის გაკეთებას მოასწრებდა, თუმცა თვითმფრინავმა სამუშაოებში ჩართვა დაბნელების გამო ვეღარ მოასწრო, – ამის შესახებ შინაგან საქმეთა მინისტრმა თურქეთიდან გამოგზავნილი სამაშველო თვითმფრინავის შესახებ განაცხადა.
“ეს თვითმფრინავი წყალზე უნდა დაჯდეს, მოაგროვოს შესაბამისი რაოდენობის წყალი.
თვითმფრინავმა წყლის მოგროვება ვერ შეძლო. დაახლოებით 20 კილომეტრში აქედან არის ტაბაწყურის ტბა, სადაც მას რეზერვუარი უნდა აევსო, თუმცა ამის გაკეთება ვერ შეძლო, ვინაიდან დაბნელდა. ხვალ, დილის 06:00 საათიდან ის ჩაერთვება ხანძრის ჩაქრობის სამუშაოებში”, – განაცხადა გიორგი მღებრიშვილმა.
მისივე ინფორმაციით, ბელარუსული ვერტმფრენი როგორც კი ჩამოვა საქართველოში, მაშინვე ჩაერთვება პროცესში. მინისტრის თქმით, ეს არის მსოფლიოში ერთ-ერთი ყველაზე დიდი ვერტმფრენი.
მინისტრის თქმით, ღამე ხანძრის გავრცელების საშიშროება ამ ეტაპზე არ არსებობს, ვინაიდან ქარი ჩადგა.