„…რა სარგებელ ეყოს კაცსა, უკეთუ სოფელი ყოველი შეიძინოს და სული თვისი იზღვიოს?…“
მათე. 16. 26.
ოზურგეთელიც არ ყოფილა!
მომბეზრდა ბეგისთის საგაზეთო წერილების წერა, ჰოდა, გადავწყვიტე, წერილი სახლში გამეგზავნა.
მისამართი ვიკითხე! – მცოდნეც გამოჩნდა და…
– თბილისი, მცხეთის ქუჩა… მკარნახობს.
წერა შევწყვიტე, გაოცებით ავხედე:
– მე ბატონ ბეგლარ სიორიძის მისამართი მინდა!
– მეც სწორედ მის მისამართს გაწერინებთ!
აქ მყოფი კაცისთვის წერილი თბილიში გამეგზავნა? – არადა, ოზურგეთელი მეგონა, თუმცა, ნაღდი ოზურგეთელი რომ არ იყო, ეს მისი მერობის შემდეგ ვიცი!
ბევრჯერ გამოგვიგზავნეს თავკაცები თბილისიდან…
ეს კი, ალბათ, პირველი შემთხვევაა, როცა ოზურგეთელებმა, ქალაქ ოზურგეთის პირველ მერად თბილისელი ბეგლარ სიორიძე აირჩეს და… ახლაც უნდა აირჩიონ (?!).
ბეგის თბილისელობამ გონება გამინათა და როგორც იქნა მივხვდი: რატომ ეძახდა ერთ თანამდებობის პირს სოფლელას, რატომ მიყო ხელი ყიდვა-გაყიდვას, ჩაის პლანტაციების ამოძირკვას, თხილების გაშენებას, შენობების შეძენას და რესტორნებად გადაკეთებას, თავისუფალი ადგილების ჯიხურებით „დამშვენებას!“
ბეგლარი თურქულად ფეოდალს ნიშნავს. ქართულად? – ოზურგეთის მბრძანებელს და მესაკუთრეს!
ბეგლარის გამო მტკივა ჩემი ოზურგეთი… კარგს რატომ ვერ ხედავო! – ბეგლარის „დაცვამ“. კარგის დანახვა ჯიხურების ფონზე ძალიან ძნელია, ძნელია, როცა სადღაც ბნელ კუნჭულში ალაგია ოზურგეთელი გმირების ძეგლები და მათ სანაცვლოდ ჯიხურებია ჩამწკრივებული.
… ეს გაყიდა, ის იყიდაო!…
გვიკვირდეს? – თბილისელი კაცია, დაუდგება ჟამი, ოზურგეთს დატოვებს, დასვენება-გართობისთვის თბილისს მიაშურებს… უმუშევარს სახსრები ხომ დაჭირდება? – ჰოდა, ოზურგეთში დანაგროვი ფულით თუ ქონებით ლაღი ცხოვრებაც აქვს განაღდებული.
ჩვენ? – ერთი ლექსი გამახსენდა:
„…ხალხი ისვენებს,
ხალხი ერთობა,
ხალხი ყველაფერს
როდი კითხულობს!“
ნაღდი ოზურგეთელები ვერც შრომობენ, ვერც ერთობიან…
რაც შეეხება კითხვების დასმას…
არის ვინმე სრულყოფილად პასუხის გამცემი?!…
არადა, დემოკრატია ხალხის ხელისუფლებააო…
ხო, ხალხის! – ოღონდ ხელისუფალნი თბილისიდან უნდა ვიხმოთ და ყოფილ ოზურგეთელს ოზურგეთელობა „დავაბრალოთ!“
ასე, რომ ბეგის მისამართის მძებნელმა გავიგე… ბეგი სიორიძე ოზურგეთელიც არ ყოფილა! გიხაროდეთ – ხმას, ქალაქის მერად, თბილისელ ბეგლარ სიორიძეს აძლევთ! აძლევთ ხმას იმას, რომელმაც არაოზურგეთელობის გამო, საკუთარ თავს ხმა ვერ მისცა!
ეს წერილი ქალბატონმა ეთერ ქადეიშვილმა, სოციალურ ქსელ “ფეისბუკის” საკუთარ გვერდზე გაავრცელა.