საკონსტიტუციო სასამართლოს მოსამართლეობის კანდიდატის ევა გოცირიძის განცხადებით, თუკი ვანო მერაბიშვილი საკნიდან სხვა მიზნით მართლა იყო გაყვანილი და მისი გაყვანა გარკვეულ ზეწოლის განხორციელების მცდელობას უკავშირდებოდა, ეს დარღვევაა.
გოცირიძის თქმით, ის, რომ მე-18 მუხლი დარღვეულად ცნო სტრასბურგის სასამართლომ, არ ნიშნავს, რომ იგი მერაბიშვილს უკანონო პატიმრად მიიჩნევს.
“რაც შეეხება ვანო მერაბიშვილთან დაკავშირებით მიღებულ გადაწყვეტილებას, მე არ მგონია, რომ ამაზე აზრი უნდა გამოვთქვა. მიმაჩნია, რომ თუკი ის მართლა იყო გაყვანილი სხვა მიზნით და მისი გაყვანა უკავშირდებოდა გარკვეულ ზეწოლის განხორციელების მცდელობას, ეს რა თქმა უნდა, არის დარღვევა. ის, რომ მე-18 მუხლი დარღვეულად ცნო სტრასბურგის სასამართლომ, ეს არ ნიშნავს, რომ იგი მიიჩნევს, რომ მისი პატიმრობა იყო უკანონო. მას შემდეგ რაც წავიკითხავ სტრასბურგის გადაწყვეტილებას, მივხვდები რა არგუმენტების საფუძველზე იყო ეს გადაწყვეტილება მიღებული. ნუ შეეცდებით, რომ ჩამრთოთ დისკუსიაში. თავს შევიკავებ”, – განაცხადა ევა გოცირიძემ.
9 ხმით 8 ხმის წინააღმდეგ, სასამართლომ დაადგინა, რომ დაირღვა კონვენციის მე-18 მუხლი 2013 წლის 14 დეკემბრის ინციდენტიდან გამომდინარე (ივანე მერაბიშვილის ღამით საკნიდან გაყვანის ეპიზოდი).