საქართველოს მთავარმა პროკურატურამ სასჯელაღსრულების დეპარტამენტის მე-8 საპყრობილის რეჟიმის ყოფილი ინსპექტორი კახა ყალიჩავა, იგივე ”ცხრათითა” დააკავა.
საქმე ეხება პატიმარ დანტე რეხვიაშვილის მიმართ სასტიკ მოპყრობას.
პროკურატურის ინფორმაციით, ჩატარებული გამოძიებით დადგენილია, რომ 2008 წლის 27 ოქტომბერს პატიმარი დანტე რეხვიაშვილი შესახლებულ იქნა სასჯელარსრულების დეპარტამენტის №8 საპყრობილეში.
”ამავე საპყრობილის რეჟიმის ინსპექტორმა და ამავდროულად კორპუსის ზედამხედველმა კ. ყ.-მ შეიტყო, რომ დანტე რეხვიაშვილი თავს არ გრძნობდა დამნაშავედ ნარკოტიკული საშუალების შეძენა-შენახვის ბრალდებაში. ამ მიზეზით მან დანტე რეხვიაშვილი მის თანასაკნელებთან ერთად გაიყვანა საპყრობილის აბაზანაში და მას დანაშაულის აღიარება მოსთხოვა, რაზედაც უარის მიღების შემდეგ თავში რადიოგადამცემი ძლიერად ჩაარტყა და ცხვირი გაუტეხა, რის შემდეგაც №8 საპყრობილის უსაფრთხოების განყოფილების ინსპექტორ ლ.ჩ.-სთან და ციხის სხვა თნამშრომლებთან ერთად განაგრძო ძირს დაგდებული დანტე რეხვიაშვილის ცემა. კ. ყ.-მ ნაცემი და დასისხლიანებული დანტე რეხვიაშვილი საკანში დააბრუნა და ცხვირის გატეხვის და მისგან გამოწვეული ძლიერი ტკივილის მიუხედავად არ მისცა მას სამედიცინო დახმარების მიღების საშუალება და მკაცრად აუკრძალა მომხდარი ფაქტის და სამედიცინო დახმარების მოთხოვნის შესახებ ვინმესთან განეცხადებინა. წინააღმდეგ შემთხვევაში, დაემუქრა, რომ მის თანასაკნელებსაც ანალოგიურად გაუსწორდებოდა. მომხდარი ფაქტიდან 2 თვის შემდეგ კ. ყ.-მ და უსაფრთხოების ინსპექტორმა ლ. ჩ.-მ კვლავ სცემეს პატიმარი დანტე რეხვიაშვილი და ისევ იმ მიზეზით, რომ იგი არ აღიარებდა ჩადენილ დნაშაულს. დაზარალებული დანტე რეხვიაშვილის ცემა და ძალადობა მხოლოდ მას შემდეგ შეწყდა, რაც მის მიმართ სასამართლომ გამამტყუნებელი განაჩენი გამოიტანა და მისგან აღიარებითი ჩვენების მიღება საქმისთვის აღარ იყო მნიშვნელოვანი. საქმეზე გრძელდება გამოძიება. კ. ყ.-ს ბრალად ედება სამსახურებრივი უფლებამოსილების გადამეტება ძალადობის და დაზარალებულის პირადი ღირსების შეურაცხყოფა, რაც სასჯელის სახედ და ზომად ითვალისწინებს თავისუფლების აღკვეთას 5-დან 8 წლამდე ვადით. #8 საპყრობილის უსაფრთხოების განყოფილების ინსპექტორ ლ.ჩ.-ს მიმართ კი არ დაიწყება სისხლის სამართლებრივი დევნა მისი გარდაცვალების გამო”, – აცხადებენ პროკურატურაში და აღნიშნავენ, რომ კ.ყ ბოლო 5 თვის განმავლობაში არ იმყოფებოდა საქართველოში და საქართველოში დაბრუნების შემდეგ სასამართლოს განჩინების საფუძველზე მოხდა მისი დაკავება.
დღეს მთავარი პროკურატურის სამართალწარმოების პროცესში ჩადებული დანაშაულის დეპარტამენტის უფროსის მოადგილე კოკა კაციტაძე დაზარალებულ დანტე რეხვიაშვილსა და კიდევ ერთ პირს ზვიად შინჯიკაშვილს შეხვდა. კაციტაძის თქმით, რეხვიაშვილისა და შინჯიკაშვილის უფლებების დარღვევის მიმართ დეპარტამენტმა მორიგი შემაჯამებელი გადაწყვეტილებები მიიღო. რაც შეეხება პოლიტპატიმარ ზვიად შინჯიკაშვილის საქმეს, პროკურატურის ინფორმაციით, იგი იყო ოპოზიციური პოლიტიკური მოძრაობის აქტიური წევრი, რომელიც მონაწილეობას იღებდა 2011 წლის 26 მაისს რუსთაველის გამზირზე ხელისუფლების წინააღმდეგ გამართულ საპროტესტო აქციაში და სწორედ მისი პოლიტიკური აქტიურობის გამო სამართალდამცველების მიერ დაიგეგმა ზვიად შინჯიკაშვილის დაკავება და მისი უკანონო ბრალდება.
”2011 წლის 6 სექტემბერს გურჯაანში ბაზრის მიმდებარე ტერიტორიაზე, როდესაც ზვიად შინჯიკაშვილი პირად საქმეზე მიდიოდა, მასთან მოულოდნელად მივიდნენ შსს გურჯაანის რაიონული სამმართველოს თანამშრომლები, რომლებმაც მას პოლიციის განყოფილებაში გაყოლა მოსთხოვეს. ადგილზე მისულს განუცხადეს, რომ იგი იყო დაკავებული ხულიგნობის ბრალდებით ბაზრის ტერიტორიაზე მომხდარი ინციდენტისთვის, რომელსაც სინამდვილეში ადგილი არ ქონია. მოგვიანებით, მისი განზრახ უკანონო ბრალდების მიზნით, დაკითხეს გამოგონილი ინციდენტის ე.წ. თვითმხილველი მოწმეები, რომლებმაც პოლიციელების ზეწოლის შედეგად გამოძიებას მისცეს ცრუ ჩვენებები ყალბი მტკიცებულებების საფუძველზე პოლიტიკური მოტივით დაკავებული შინჯიკაშვილი გასამართლდა თელავის რაიონული საასმართლოს მიერ და მიესაჯა 4 წლით დავისუფლების აღკვეთა. პოლიტიკური ნიშნით დაკავებულმა ზვიად შინჯიკაშვილმა საპატიმრო დაწესებულება 2012 წელს ხელისუფლების ცვლილების შემდეგ დატოვა, როდესაც საქართველოს პარლამენტმა მას პოლიტპატიმრის სტატუსი მიანიჭა.
აღნიშნულ საქმეში, ახალი გამოძიების პროცესში მოპოვებული მტკიცებულებებით, მათ შორის ზვიად შინჯიკაშვილის დაკავების შემსწრე ახალი მოწმეების ჩვენებებით დადასტურდა, რომ მის მიმართ ბრალად შერაცხულ დანაშაულებრივ ქმედებას ადგილი არ ჰქონია, რის გამოც პროკურატურის მიერ გამოტანილია დადგენილება მსჯავრდებულის უფლების დარღვევის თაობაზე, რის საფუძველზეც ჩვენ მივმართავთ თბილისის სააპელაციო სასამართლოს ახლადგამოვლენილ გარემოებათა გამო განაჩენის გადასინჯვის მოთხოვნით.
საქართველოს მთავარი პროკურატურის სამართალწარმოების პროცესში ჩადენილი დანაშაულის გამოძიების დეპარტამენტი აქტიურად აგრძელებს საპატიმრო დაწესებულებებში პატიმრების მიმართ ჩადენილი არასათანადო მოპყრობის ფაქტების გამოძიებას და უკანონოდ გამოტანილი გამამტყუნებელი განაჩენების გადასინჯვას“, – ნათვამია განცხადებაში.
ამასთან, კოკა კაციტაძის თქმით, ბრალდებულს სასტიკ მოპყრობაში ათეულობით ადამიანი ადანაშაულებს, რის გამოც შესაძლოა მას ბრალი დაუმძიმდეს.