ავთანდილ იმედაძე: საოპერაციოში დაჭრილი მოსწავლის სიცოცხლის გადასარჩენად ბრძოლა მიმდინარეობს

რესპუბლიკურ საავადმყოფოში, ხორავას ქუჩაზე დაჭრილი 16 წლის მოზარდის ოპერაცია გრძელდება.
რესპუბლიკური საავადმყოფოს დირექტორის ავთანდილ იმედაძის თქმით, პაციენტი კლინიკაში მრავლობითი ჭრილობებითაა შესული. კერძოდ, გულ-მკერდის არეში აქვს შემავალი ჭრილობა, ასევე მუცლის არეში, დაზიანებული აქვს მაგისტრალური სისხლძარღვები, კერძოდ ბარძაყის არტერია, ვენა და აღნიშნულის გამო, პრაქტიკულად, მოზარდის წნევა საავადმყოფოში შესვლისას ნული იყო.
დირექტორის თქმით, გულის რითმი აღდგენილია, ხოლო წნევა დარეგულირებული.
“საოპერაციოში მიდის ბრძოლა სიცოცხლის გადასარჩენად. ახლა სიტუაცია ოდნავ სტაბილური გახდა, რაც გვახარებს. მთავარია, როგორ ჩაივლის ოპერაცია, რომელიც უკვე ორი საათია მიმდინარეობს. მთავარი იყო სისხლდენის შეჩერება, გულის რითმის აღდგენა. წნევა დარეგულირდა”, – განაცხადა რესპუბლიკური საავადმყოფოს დირექტორმა.
ავთანდილ იმედაძემ იმედი გამოთქვა, რომ მოზარდის მდგომარეობა გაუმჯობესდება.
ამ წუთებში რესპუბლიკურ საავადმყოფოში მივიდა შრომის, ჯანმრთელობისა და სოციალური დაცვის მინისტრის მოადგილე ზაზა სოფრომაძე.