ყოფილი მთავარი პროკურორი არჩილ კბილაშვილი საქართველოში ხელისუფლების ცვლილებიდან მალევე აჰმედ ჩატაევის პატიმრობიდან გირაოთი გათავისუფლებას სწორ გადაწყვეტილებას უწოდებს.
როგორც კბილაშვილმა ჟურნალისტებს განუცხადა ჩატაევის გირაოთი გათავისუფლება საქმის მასალების საფუძველზე მოხდა.
“ჩატაევის სისხლის სამართლის საქმე ვიცოდი და პროფესიულად მქონდა შეხება. მის შინაარსზე კომენტარი უნდა გააკეთოს პროკურორმა და არა ყოფილმა პროკურორმა. ჩატაევთან დაკავშირებით, რა მოხდა მისი გათავისუფლების შემდეგ, ამაზე მეტ შეფასებას ვერ გავაკეთებ. სასამართლოს მისი გირაოთი გათავისუფლების შუამდგომლობით, მივმართეთ სისხლის სამართლის საქმის მასალების საფუძველზე.
როდესაც არის კონკრეტული სისხლის სამართლის საქმე, პროკურორი უნდა გამოვიდეს საქმეში არსებული მასალებიდან და არა იმ ვარაუდით, რა მოხდება ხვალ, ზეგ და მაზეგ. არავინ ვიცით, რომელი ადამიანი სისხლის სამართლის საქმის დასრულების შემდეგ რას ჩაიდენს”, – განაცხადა კბილაშვილმა.
22 ნოემბერს ბერი გაბრიელ სალოსის ქუჩაზე ჩატარებული , სპეცოპერაციის შედეგად ლიკვიდირებულია სამი პირი, მათ შორის აჰმედ ჩატაევი. ანტიტერორისტული ოპერაციის დროს დაიღუპა სუს-ის ერთი თანამშრომელი.