სასტუმრო „ლეოგრანდის“ მენეჯმენტმა ხანძრის დროს გარდაცვლილების ოჯახებთან კომპენსაციის საკითხზე მოლაპარაკებების ეტაპი დაასრულა.
როგორც კომპანიის ადვოკატი, კახა წერეთელი ამბობს, 10-ვე ოჯახთან უკვე გაფორმდა შესაბამისი ხელშეკრულება.
„დავასრულეთ მოლაპარაკებები დაზარალებულებთან, კერძოდ 10 ოჯახთან, რომლებიც საქართველოს მოქალაქეები არიან. წერილობითი შეთანხმებები გაფორმებულია, მატერიალური კუთხით ზარალის ანაზღაურებაზე. თანხების დასახელებისგან თავს შევიკავებ, თუმცა საუბარია როგორც ერთჯერად კომპენსაციაზე, ასევე გარდაცვლილთა შვილებზე სრულწლოვნობის მიღწევამდე, დახმარების გაცემაზე და ასევე მათი უმაღლეს სასწავლებელში ჩაბარების შემთხვევაში, სწავლის თანხის ანაზღაურებაზე. პრაქტიკულად დასრულებულია მოლაპარაკება უცხოელთანაც, თუმცა დარჩენილია მცირე ტექნიკური საკითხები, რომლის მოგვარების შემდეგაც მოხდება ასევე მათთვის კომპენსაციის გაცემა“, – აღნიშნა კახა წერეთელმა.
მისი თქმით, ოჯახები კონკრეტული თანხის გარდა, ბავშვების განათლებისა და დასაქმების უზრუნველყოფის ვალდებულებასაც იღებენ.
შეგახსენებთ, რომ სასტუმრო „ლეოგრანდში“ ხანძარზე გამოძიება ამ დრომდე მიმდინარეობს. ხანძრის მიზეზს გამოძიება დაადგენს. გამოძიების ფარგლებში, დაიკითხა არაერთი პირი, შენობას კი ამ დრომდე სამართალდამცავები იცავენ. შენობა მფლობელის განკარგულებაში გამოძიების დასრულების შემდეგ დაბრუნდება, თუმცა რა პროფილითა და სახელწოდებით გააგრძელებს მუშაობას, სასტუმროს მენეჯმენტში ამ დრომდე არ საუბრობენ.
ხანძრის დროს გარდაცვლილთა ახლობლებმა კომენტარისგან თავი შეიკავეს, პირად საუბარში კი აცხადებენ, რომ კომპანიისგან, კომპენსაციის სახით, 50 000 დოლარს მიიღებენ.