აჭარის მთავრობის თავმჯდომარე ზურაბ პატარაძე თურქეთში ართვინის გუბერნიაში გუბერნატორს შეხვდა. როგორც ზურაბ პატარაძემ შეხვედრის შემდეგ განაცხადა, სარფის საბაჟოზე დაწესებული ახალი რეგულაციები ორ ქვეყანას შორის სახელმწიფო დონეზე განიხილება. მისივე თქმით, საქართველოს მოქალაქეებს მეზობელ ქვეყანაში გადაადგილების კუთხით პრობლემა არ შეექმნებათ.
“პირველ რიგში უნდა აღინიშნოს, რომ უახლოესი თვეების განმავლობაში ჩვენს მოქალაქეებს არ ექნებათ შეზღუდვა საზღვრის კვეთასთან დაკავშირებით და ისინი ჩვეულ რეჟიმში გააგრძელებენ მიმოსვლას. აღნიშნულ საკითხზე აქტიურ ფაზაშია ორმხრივი კონსულტაციები ოფიციალურ თბილისსა და ოფიციალურ ანკარას შორის, მუშაობს ცენტრალური და ადგილობრივი ხელისუფლების სხვადასხვა ინსტანციის წარმომადგენლები. ამავდროულად, შედგა შეხვედრა ართვინის გუბერნიისა და აჭარის ავტონომიური რესპუბლიკის მთავრობის ხელმძღვანელ პირებს შორის. ართვინის გუბერნატორი, ისევე როგორც სასაზღვრო და ძალოვანი სამსახურების ხელმძღვანელი პირები, ასევე თურქეთის ბიზნეს-სექტორის წარმომადგენლები მზადყოფნას გამოხატავენ ოფიციალურ ანკარასთან მოლაპარაკებებში ჩართულობის და საკითხის მხარდაჭერის კუთხით.
გარდა ამისა, ქვეყნებს შორის რეგულაციების საბოლოო დაზუსტებამდე, განიხილება კონკრეტული დროებითი მექანიზმის შემუშავება იმ ადამიანებისთვის, რომლებიც ყოველდღიურ რეჟიმში კვეთენ საზღვარს. ჩვენ ვაგრძელებთ მუშაობას, დამატებითი დეტალების შესახებ აუცილებლად ვაცნობებთ საზოგადოებას, – განაცხადა აჭარის მთავრობის თავმჯდომარე ზურაბ პატარაძემ ართვინის გუბერნატორთან შეხვედრის შემდეგ.
სარფში საქართველოს მოქალაქეებმა დილით საპროტესტო აქცია გამართეს. ისინი საზღვარზე დაწესებულ ახალ რეგულაციას აპროტესტებდნენ.