Human rights watch-მა 2018 წლის ანგარიში გამოაქვეყნა. ანგარიში 90-ზე მეტ ქვეყანაში, გასულ წელს ადამიანის უფლებების მხრივ არსებულ პრაქტიკას აფასებს.
ანგარიშში საუბარია საქართველოზეც. კერძოდ, საქართველოს საკონსტიტუციო რეფორმაზე, ნარკოპოლიტიკაზე, პირადი ცხოვრების ხელშეუხებლობის, შრომით უფლებებსა და მედიის თავისუფლებაზე.
როგორც ანგარიშშია ნათქვამი, „გასულ წლებთან შედარებით, მონაცემების კლების მიუხედავად, 2017 წელსაც საქართველო კვლავ იყენებდა ნარკოდანაშაულთან ბრძოლის მკაცრ კანონებს, ნარკომომხმარებელთა სისხლისსამართლებრივი დევნისთვის იმ პირობებში, როდესაც მკურნალობის შესაძლებლობები შეზღუდული რჩება“
ამასთან აღნიშნულია, რომ საქართველოს პარლამენტმა კანონმდებლობაში შეიტანა ცვლილება, რომლითაც 70 გრამამდე მარიხუანას შენახვისთვის, სასჯელის ზომად პატიმრობა გაუქმდა.
„საკონსტიტუციო სასამართლოს 2015 წლის გადაწყვეტილების აღსრულებისთვის, რომლითაც მარიხუანის შენახვისთვის პირის დაპატიმრება არაკონსტიტუციურად იქნა ცნობილი, პარლამენტმა, 2017 წლის ივლისში, კანონმდებლობაში შეიტანა ცვლილება, რითაც გაუქმდა პატიმრობა, როგორც სასჯელის ზომა 70 გრამამდე მარიხუანის შენახვისთვის; თუმცა, პატიმრობა სასჯელის ზომად რჩება ამ ნივთიერების უფრო დიდი მოცულობით შენახვისთვის. ნარკოდანაშაული ხშირად ისჯება არაპროპორციულად ხანგრძლივი პატიმრობით, ძალიან მაღალი ჯარიმებითა და სხვა უფლებების შეზღუდვით“, –აღნიშნულია ანგარიშში.