რუსთავის ტყეში, მტკვრის სანაპიროსთან ათეულობით დახოცილი ცხვარი იპოვეს.
მდინარის ახლოს თვითნებურად დაყრილი და გახრწნილი ლეშის სუნი ასობით მეტრზე იგრძნობა. როგორც ცნობილია, ლეში იმ ფერმის თანამშრომლებმა დაყარეს, რომელიც აღნიშნული ტერიტორიიდან რამდენიმე მეტრში მდებარეობს.
როგორც „კურიერთან“ საუბარში ფერმის თანამშრომლები ამბობენ, მათ დახოცილი ცხოველი მას შემდეგ გამოიტანეს, რაც მათი უშუალო ხელმძღვანელისგან მიიღეს დავალება. მათი თქმით, ცხვრები ბოლო პერიოდში გარკვეული დაავადებით იხოცებიან.
„ცხვრების დახოცვა დაავადებამ გამოიწვია, ათობით ცხვარია დახოცილი. მე ვეტერინარი ვარ და ახლა გადარჩენილ ცხვრებს დაავადებაზე ვცრით, საშიში დაავადება არ არის და ადამიანისთვის საფრთხეს არ წარმოადგენს“,- განაცხადა ვეტერინარმა რამიზ გოჯაევმა.
ფერმა, რომლის ტერიტორიაზეც ცხვრების დაყრა მოხდა, უცხოელ ბიზნესმენებს ეკუთვნით.
სურსათის უვნებლობის წარმომადგენელი ზურაბ მაკარაძე აცხადებს, რომ ცხვარი აშკარად გაციებულია. რა სახის სანქცია დაეკისრებათ ფერმის მეპატრონეებს, ჯერ-ჯერობით უცნობია. ეს მას შემდეგ გადაწყდება, რაც შესაბამისი უწყებები დაადგენენ, თუ რა ზარალი მიადგა მათი ქმედებით გარემოს.