“ნაციონალური მოძრაობის“ წევრმა, რომან გოცირიძემ პარლამენტში ხინკალი მიიტანა. მისი თქმით, მიუხედავად იმისა, რომ უზენაესი სასამართლოს მოსამართლეობის ერთ-ერთი კანდიდატის შალვა თადუმაძის კურსელების აღმოჩენა ვერ მოხერხდა, პირობის შესრულება მაინც გადაწყვიტა.
“მიუხედავად ჩემი შეთავაზებისა, თუ ერთ-ერთი კანდიდატის, შალვა თადუმაძის თანაკურსელები გამოჩნდებოდნენ, მათ ხინკალზე დავპატიჟებდი, კურსელების აღმოჩენა ვერ მოხერხდა, თუმცა პირობის შესრულება მაინც გადავწყვიტე“, – განაცხადა გოცირიძემ.
ხინკალი დეპუტატის შეკვეთით ილია ჭავჭავაძის სახელობის დარბაზთან მიიტანეს, სადაც იურიდიული კომიტეტის სხდომაზე მოსამართლეობის კანდიდატის მოსმენა მიმდინარეობდა. ხინკლის ყუთებზე შემდეგი სახის წარწერა იყო: “თუ უდიპლომო არ მიდის ხინკალთან, ხინკალი თავად მიდის დიპლომიანებთან“.
ხინკლისა და დიპლომის თემა მას შემდეგ გახდა აქტუალური, რაც უზენაესი სასამართლოს მოსამართლეობის კანდიდატის შალვა თადუმაძის დიპლომის ნამდვილობასთან დაკავშირებით ეჭვები გაჩნდა.