კანადის პრემიერ-მინისტრი მარკ კარნი აცხადებს, რომ მისმა მთავრობამ განიხილა ნაკლებად სავარაუდო სცენარი, კერძოდ, აშშ-ის მიერ კანადის წინააღმდეგ სამხედრო ძალის გამოყენების სცენარი.
კარნის თქმით, მთავრობამ „უკიდურესად დაბალი ალბათობის, მაგრამ კატასტროფული შედეგის მქონე რისკის“ სცენარი დეტალურად შეაფასა და შესაბამისი ზომებისთვისაც მოემზადა, თუმცა კონკრეტულ დეტალებზე არ უსაუბრია.
„ვფიქრობ, ამ თანამდებობებზე ყოფნისას გაქვს პასუხისმგებლობა, განიხილო უკიდურესად დაბალი ალბათობის მქონე, მაგრამ სერიოზული რისკები. ეს უბრალოდ რისკების მართვაა. ეს არ არის ძირითადი სცენარი, თუმცა მისი გათვალისწინებისა და მომზადების გარეშე მოქმედება უპასუხისმგებლობა იქნებოდა“, – განაცხადა კარნიმ.
კარნის თქმით, მიუხედავად დაძაბული ურთიერთობისა, ის ტრამპს ხშირად ესაუბრება.
„ჩემი გადმოსახედიდან, ჩვენ კარგი ურთიერთობა გვაქვს იმ გაგებით, რომ შეგვიძლია, ტელეფონი ავიღოთ და ერთმანეთთან საკითხებზე ვისაუბროთ“, – განაცხადა კანადის პრემიერ-მინისტრმა.
მისივე თქმით, ორივე მხარე საკუთარ პოზიციას პირდაპირ აფიქსირებს, რაც მოლაპარაკებების პროცესს უფრო ეფექტიანს ხდის.
კარნიმ ასევე განაცხადა, რომ აშშ-სთან სავაჭრო მოლაპარაკებების განახლების შესაძლებლობას კვლავ ხედავს. მისი შეფასებით, ორ ქვეყანას შორის არსებული მეგობრული ურთიერთობების აღდგენა ორივე მხარისთვის სასარგებლო იქნება.
აშშ-სა და კანადას შორის ურთიერთობა დონალდ ტრამპის პრეზიდენტობის პერიოდში რამდენჯერმე დაიძაბა. ტრამპს არაერთხელ აქვს ნათქვამი, რომ კანადა აშშ-ის „51-ე შტატი“ უნდა გახდეს.